Дзæуджыхъæуы уыд Креативон индустриты регионты ‘хсæн дыккаг форум «Кавказаг акцент». Йæ пленарон сесси «Кавказы креативон индустри: традицитæ æмæ ныры дуджы иудзинад»-ы архайдта РЦИ-Аланийы Сæргълæууæг Сергей Меняйло.
Республикæйы уазджытæ уыдысты эксперттæ æмæ специалисттæ Цæгат Кавказы субъекттæ æмæ Уæрæсейы иннæ регионтæй – амалхъомтæ, продюсертæ, архитектортæ, дизайнертæ, æрмдæснытæ æмæ хицаудзинады оргæнты минæвæрттæ.
Ацы аз форумы темæ у «Этно мах», æвдисы, Кавказы фæлгонцæн хæдхуыз культурон акцент чи дæтты, ахæм национ традицитæ æмæ ног сфæлдыстадон проектты иудзинад.
Сергей Меняйло фæбæрæг кодта, федералон æмвæзадыл креативон индустримæ æргом здæхт кæй цæуы куыд хицæн æххæст къабазмæ, æмæ Цæгат Кавказ дæр хъуамæ æмдзу кæна креативон экономикæимæ, йæхи ирд хæдбындур цардыуаг бахъахъхъæнгæйæ.
– Кавказ хицæн фæзуат у йæхи сæрмагонд культурæ æмæ адæмимæ. Кавказы цы адæмыхæттытæ цæры, уыдонæй алкæмæн дæр ис йæхи традицитæ æмæ æгъдæуттæ, фæлæ нын ис иумæйаг культурон код, йæ бындур та сты дæрдтыл хъуыстгонд уазæгуарзондзинад, хистæртæн нымд кæнын, сылгоймагæн аргъ кæнын, бахъуаджы сахат æххуысмæ фæтагъд кæнын. Махæн нæ бон у иумæйаг нысантæм иумæ цæуын. Рæстæгæн йæхи домæнтæ ис, къорд азы размæ дæр ма ничи зыдта, цы сты креативон индустритæ, уый. Абон та сты экономикæйы хицæн, сæрмагонд къабаз æмæ ахъардтой нæ царды. Дарддæр сæ парахат кæнæм, нæ национ хæдбындурдзинад бахъахъхъæнгæйæ, уыимæ, рæстæджы домæнтæн дзуапп дæтгæйæ. Уыцы фарстатæ та бахынцын æмбæлы, абон цы форумы фæзуаты стæм, ахæмты. Мах хъуамæ иумæ æмвæндæй иу уынаффæмæ æрцæ-уæм, цæмæй нырыккон уавæрты, ногдзинæдтыл нæ иуварсгæнгæйæ, нæ уидæгтæ ма ферох кæнæм, сæрыстыр дзы уæм æмæ бахъахъхъæнæм нæ æрдхæрæны традицитæ. Кæрæдзимæ куы байхъусæм, уæд уый не ‘ппæтæн дæр пайда уыдзæн, хорз хъуыдытæ æмвæндæй царды уадзын æнцондæр у! – загъта Сергей Меняйло.
Эксперттæй пленарон æмбырды раныхас кодтой Креативон кластерты цæдисы сæрдар Илья Токарев, Æнæкоммерцион автономон организаци «Центр 800» (г. Дæллаг Новгород) Алена Потемкина, Хетæгкаты Къостайы номыл Цæгат Ирыстоны паддзахадон университеты аивæдты факультеты декан, Вахтанговы Хæдзары директор Атайты Мæдинæ, ресторатор Зассеты Тамерлан.
Форумы архайджытæн бацæттæ кодтой тематикон фæзтæ ахæм здæхтты, куыд ахуырад, аивадон æрмдæснытæ, гастрономи æмæ æндæртæ.
«Кавказаг акцент»-ы ма сæрмагондæй æрмæг бацæттæ кодтой архитектурон къабазæн, Цæгат Ирыстоны 2026 аз Архитектурæйы аз кæй расидтысты, уый тыххæй. Йæ культурон хъæздыг программæйы фæлгæты арæзт æрцыд къорд
мадзалы, се ‘хсæн – Кавказы нывгæнджыты куыстыты равдыст «Горæт кæсы», æрмдæсныты арæзт дзаумæтты армукъа, этно-фьюжн-фестиваль «Пысыра». Уымæй уæлдай ма дзы хицæн фæзты саходæн уыдис дзаджджын хæринæгтæй.
Форум сарæзта РЦИ-Аланийы Креативон индустриты рæзты фонд РЦИ-Аланийы Хицауад æмæ Стратегион хъæппæристы агентады æххуысæй.
РЦИ-Аланийы Сæргълæууæг æмæ Хицауады пресс-службæ
