РЦИ-Аланийы премьер-министр ДЗАНАЙТЫ Барис дзы сæрдариуæг кодта, афтæмæй уыд «Æнæниздзинад хъахъхъæнынады къабаз райрæзын кæныны» паддзахадон программæ æмæ профилон федералон проекттæ царды рауадзыны фæдыл æмбырд.
Фарстаимæ баст ныры уавæрыл ныхас кодта республикæйы æнæниздзинад хъахъхъæнынады министр Митциты Астан. Куыд загъта, афтæмæй национ проекттæ сæххæст кæнынæн ацы аз дихгонд æрцыд 960 милуан сомæй фылдæр. Уæлдай фылдæр æргом æмбырды архайджытæ аздæхтой æнæниздзинад хъахъхъæнынады къабазы фыццаградон къæпхæн рацаразыны егъау проект царды рауадзынмæ. Уый фæлгæты нысангонд цæуы медицинон кусæндæтты материалон-техникон бындур сног кæнын. Афтæ, Дыгуры æмæ Горæтгæрон районты центрон рынчындæттæн балхæндзысты ног рентгенаппараттæ, Æрæфы центрон рынчындон æмæ Дзæуджыхъæуы 4-æм поликлиникæйæн та – ног флюорографтæ. Уымæй уæлдай, æлхæд æрцæудзæн 11 медицинон автотранспорты, æмæ сæ байуардзысты, машинæтæй хъуаг чи ‘ййафы, уыцы медицинон кусæндæттыл.
Цы рацарæзты мадзæлттæ снысан кодтой, уыдоны ‘хсæн сты: бындурон цалцæггæнæн куыстытæ Хæзныдоны амбулаторийы, горæты 1-æм поликлиникæйы филиал – Заводы поселок æмæ Дзæуджыхъæуы 4-æм поликлиникæйы сылгоймæгты консультацийы бæстыхай.
Уымæй уæлдай, пъланмæ гæсгæ, хъуамæ арæзт æрцæуой æнæниздзинад хъахъхъæнынады къабазы фыццаградон къæпхæны аст объекты: фелсырон пункттæ Уæллаг Ларс æмæ Эзмийы, стæй амбулаторитæ Павлодольск, Терск æмæ Троицкы станицæты, Уæллаг Фыййагдоны, стæй Дачнæ æмæ Спутничы поселокты.
Онкологион низты ныхмæ тох кæныны программæмæ гæсгæ, ног медицинон ифтонггæрзтæ хъуамæ фæзына республикон онкологион диспансеры.
Реабилитацийы нырыккон техникæ фæзындзæн Дзæуджыхъæуы 4-æм поликлиникæ æмæ Мæздæджы центрон рынчындоны. «Ныййарджытæ æмæ сывæллæтты хъахъхъæныны» проекты фæлгæты цæугæ медицинон техникæтæ та фæзындзæн Дзæуджыхъæуы сывæллæтты 2-æм поликлиникæйы, стæй Горæтгæрон æмæ Мæздæджы районты центрон рынчындæтты.
Дзанайты Барис куыд бафиппайдта, афтæмæй æппæт куыстытæ дæр хъуамæ æххæстгонд цæуой се ‘мгъуыдтæм гæсгæ æмæ, республикæйы Сæргълæууæг Сергей Меняйло нæ размæ цы хæстæ æвæры, уыдон нымайгæйæ.
– «Æнæниздзинад хъахъхъæнынады къабазы рацарæзт»-ы программæ æххæстгæнинаг у бæрзонд æмвæзадыл. Ныхас цæуы, медицинон лæггæдтæ зынгæ чи фæхуыздæр кæндзæн, уыцы бындурон ивддзинæдтыл. Уыцы ивддзинæдтæ, медицинон кусæндонмæ æрбацæугæйæ, хъуамæ банкъара республикæйы алы цæрæг дæр, – загъта Хицауады Сæрдар.
Уымæй уæлдай, «Хъæууон дохтыр» æмæ «Хъæууон фелсыр», зæгъгæ, ацы программæтæ царды рауадзынæн ацы аз лæвæрд цæуы 13 милуан сомы.
Æнæниздзинад хъахъхъæнынады министрадæн Дзанайты Барис бабар кодта паддзахадон контракттæ æххæст кæнынмæ, цалцæггæнæн куыстыты æнæкъуылымпы цыдмæ, медицинон ифтонггæрзтæ ласын æмæ сæ æвæрынмæ, стæй ног медицинон автотранспорты куыстмæ лæмбынæг цæст дарын.
ДЕДЕГКАТЫ Зæлинæ
