РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Архайдтой дзы министрадтæ æмæ ведомствæты разамонджытæ, районты сæргълæуджытæ. Ныхас дзы цыд социалон-экономикон цардимæ баст фарстатыл.
Хицауады Сæрдары хæдивæг Томайты Ирбег фехъусын кодта республикæйы оперативон уавæр: – Ивгъуыд къуырийы дæргъы республикæйы æвирхъау цаутæ не ’рцыд. Фондз районы, 32 хъæуы дарддæр дæр тæссаг у зынгсирвæзтытæй. 31 августæй 6 сентябрмæ ахуыссын кæнын бантыст 32 зынгсирвæзты. Хъыгдард дзы ничи баййæфта. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, рес-
публикæйы фæндæгтыл æрцыд 83 фæндаггон фыдбылызы. Хъыгдард баййæфтой 22 адæймаджы. Дыууæ адæймаджы фæмард сты. Арвыком æмæ Транскамы фæндæгтæ гом сты автотранспорты æппæт хуызтæн дæр.
Республикæйы фæндæгтыл электронон рады æнхъæлмæ кæсынц 79 машинæйы. Уæрæсейы Федераци æмæ Гуырдзыстоны ‘хсæн арæныл уæлдæр амынд рæстæгмæ дыууæрдæм ахызтысты 27460 автотранспортон иуæджы æмæ 81305 адæймаджы.
Æнæнхъæлæджы уавæрты министрады регионалон управленийы хъусынгæнинагмæ гæсгæ, республикæйы ахуыссын кæнын бантыст 32 зынгсирвæзты. Уыдонæй 19 – хус кæрдæг, 5 – бырондæттæ, 2 – арæзтæдтæ æмæ автотранспорты 4 иуæджы. Хус кæрдæгыл арт кæй бандзæрстой, уый тыххæй цыппар адæймаджы дзуапп ратдзысты закъоны раз. Сæ иумæйаг ивар та у 160 мин сомы.
Цæгат Ирыстоны Мидхъуыддæгты министрады хъусынгæнинагмæ гæсгæ, 31 августæй 6 сентябрмæ регионы æрцыд 113 фыдракæнды. Раргом кæнын дзы бантыст 69. Къуырийы дæргъы республикæйы ахуырадон æмæ æнæниздзинад хъахъхъæнынады кусæндæттæм æбæрæг фыдгæнджытæ æрвыстой терроризмимæ баст хъусынгæнинæгтæ. Æппæт хъæугæ мадзæлттæ саразгæйæ, барадхъахъхъæнæг оргæнтæ сбæрæг кодтой, уыцы хъусынгæнинæгтæ мæнг кæй уыдысты, уый.
Республикæйы Сæргълæууæг æппæт бæрнон кусджытæн дæр бафæ-
дзæхста – ахæм хъусынгæнинæгты фæдыл барадхъахъхъæнæг оргæнтæм афойнадыл хъусын кæнын.
– Терроризмы тыххæй мæнг хъусынгæнинæгты нымæц сбирæ. Хатгай ахæм хъусынгæнинаг кæмæ ‘рбацæуы, уый йæ афоныл нæ фены. Скъолаты директортæ, администрациты сæргълæуджытæ æмæ иннæ бæрнон кусджытæ хъуамæ æдзух дæр сæ телефонтæм кæсой æмæ ахæм хъусынгæнинæгты тыххæй рæстæгыл хабар хæццæ кæной барад хъахъхъæнæг оргæнтæм, цæмæй уыдон хъæугæ мадзæлттæ аразой, – загъта Сергей Меняйло.
«Роспотребнадзор»-ы регионалон хайад фехъусын кодта, республикæйы эпидемиологион уавæр нывыл кæй у, уый. Ивгъуыд къуыри ног коронавирусон инфекци разынд цыппар адæймагмæ.
РЦИ-Аланийы ахуырад æмæ наукæйы министр Алыбегты Эллæ радзырдта, республикæйы æппæт астæуккаг скъолаты дæр хъарм хæринаджы фарста лыггонд кæй æрцыд, уый. Ног ахуыргæнæн чингуытæ уæрст цæуынц скъолатыл, уыдонимæ æрвыст æрцæудзысты Кæсæг-Балхъары æмæ Хъæрæсе-Черкесы цы ирон хъæутæ ис, уырдæм дæр.
РЦИ-Аланийы цæрæнуатон-коммуналон хæдзарад, артаг æмæ энергетикæйы министр Хъараты Тимур фехъусын кодта, «Лукойл»-мæ йæхи бензин кæй нæй, уымæ гæсгæ разы у, цæмæй йын йæ инфраструктурæйæ пайда кæной.
Сергей Меняйло Хъараты Тимурæн бафæдзæхста, цæмæй артаджы æргътæм карздæр цæст дарой. Ноджы ма бадомдта бирæфатерон хæдзæртты ныккæндтæм базилын, цæмæй æмбæлгæ уагыл
уой.
Министр ма фæбæрæг кодта, зымæджы хъармгæнæн рæстæгмæ 91 проценты бæрц цæттæ кæй сты, уый.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
