Знон нæ республикæйы кадджын уавæры сбæрæг кодтой фыццаг ирон мыхуыры фæрæз – «Ирон газет»-ы рацыды 120 азы бон. Уыцы цау Цæгат Ирыстоны журналистикæйы историйы ахсы сæрмагонд бынат.
Уæды рæстæджы ирон æвзагыл газеты рацыдæн стыр æхсæнадон ахадындзинад уыдис. Йæ фыццаг тираж кæд æдæппæтæй 500 экземпляры уыд, уæддæр æй схонæн ис ирон национ журналистикæйы фыццаг ратæдзæн. «Ирон газет» сси йæ дуджы хъæлæс, ахъаззаг ирд сыф ныффыста ирон адæмы историйы.
Хъыгагæн, газеты хъысмæт бынтон амондджын нæ разынд – æдæппæтæй йæ авд номыры куы рацыд, уæд æхгæд æрцыд Терчы облæсты инæлар-губернаторы бардзырдмæ гæсгæ. Фæлæ иу хатт дæр ма йæ зæгъæм, арф фæд ныууагъта нæ историйы.
Абон, 120 азы фæстæ, мах мысæм, национ мыхуыры фæрæзтæн бындур чи сæвæрдта, уыдон. Сæ руаджы сæвзæрдысты абоны хъомысджын дзыллон мыхуыры фæрæзтæ.
Æмæ, кæй зæгъын æй хъæуы, «Ирон газет»-ы фыццаг номыры рацыд республикæйы рохуаты нæ баззад. Преми «Журналист года – 2026»-йы уæлахиздзаутæ сбæрæг сты, æмæ сын газеты юбилейы бон хæрзиуджытæ кадджын уавæры лæвæрд æрцыдысты. Конкурс расидт æхсæнадон организаци «РЦИ-Аланийы Журналистты цæдис – Уæрæсейы Журналистты цæдисы регионалон хайад». Йæ фарсмæ балæууыдысты – Бетъырбух æмæ Ленинграды облæсты ирон æхсæнæдтæ. Кадджын мадзал ацыд Национ библиотекæйы.
Ам ма зæгъын хъæуы уый, æмæ, Хуссар Ирыстоны æрвылаз 23 июлы кæй бæрæг кæнынц Дзыллон хабархæссæг фæрæзты бон.
«Ирыстоны дзыллон фæрæзтæ сты Уæрæсейы хабархæссæг фæрæзты вазыгджын хай, ам архайынц, куыстæй чи нæ тæрсы, ахæм æцæг профессионалтæ, уымæн æвдисæн – не ‘хсæнад кæй сарæзта, уыцы фыццаг конкурс. Арфæ кæнæм Бетъырбух æмæ Ленинграды облæсты ирон æхсæнæдтæн. Се ‘ххуысы тыххæй сын – стыр бузныг. Сæ руаджы нæ бон у не ‘мкусджытæн канд хæрзиуджытæ нæ, фæлæ ма æхцайы премитæ раттын дæр», – йæ арфæйы ныхасы загъта Цæдисы сæрдар Хъуысаты Тимур.
Жюрийы сæрдар – Уæрæсейы телерадиокомпанийы генералон директоры хæдивæг, Уæрæсейы Федерацийы Æхсæнадон палатæйы дзыллон информацион рæзты къамисы сæрдар, Уæрæсейы Президенты раз æхсæнадæмон ахастдзинæдты Советы уæнгы Рифат Сабитов Мæскуыйæ сæрмагондæй ссыд Цæгат Ирыстонмæ, цæмæй хуыздæртæй хуыздæр журналисттæн арфæ ракæна æмæ хæрзиуджытæ ратта.
Кадджын мадзалы архайдта РЦИ-Аланийы Парламенты Сæрдар Тускъаты Таймураз æмæ йæ раныхасы фæбæрæг кодта, дзыллон информацион фæрæзты кусджытæ алы рæстæджыты дæр республикæйы рæзтмæ сæ бавæрæн кæй хæссынц.
Цæгат Ирыстоны Сæргълæууæг Сергей Меняйлойы арфæйы фыстæг конкурсы архайджытæн бакаст РЦИ-Аланийы Дзыллон информацион фæрæзты комитеты хицауы хæдивæг Эльдар Афашоков.
Газет «Рæстдзинад»-ы коллективæн тынг æхсызгон уыд, се ‘мсисонтæ Саутæты Тамилæ æмæ Татьяна Шеходанова дæр хæрзиуджытæй хорзæхджын кæй æрцыдысты, уый. Тамилæйæн саккаг кодтой æртыккаг бынат номинаци «Мыхуыргонд фæрæзтæ»-йы, Татьянайæн та – куыд «Рæстдзинад»-ы къамисæгæн.
Зæрдиаг арфæ кæнæм Саутæты Тамилæ, Татьяна Шеходанова æмæ, знон йæ ахъаззаг куысты тыххæй хæрзиуæг кæмæн саккаг кодтой, уыдонæн.
ГАПБАТЫ Алетæ
