Уæрæсейы уæлдæр ахуыргæнæндæтты студенттæн æппæты кадджындæр сты Уæрæсейы Федерацийы Президент æмæ Уæрæсейы Федерацийы Хицауады стипендитæ. Уыдон лæвæрд цæуынц, стипенди снысан кæнынæй дыууæ азы раздæр ахуыр æмæ наукон иртасæнты зынгæ æнтыстдзинæдтæ йæ къухы кæмæн бафтыд, уыцы студенттæн.
Цæгат Ирыстоны Медицинон академийæн разæнгардгæнæн фæци, йæ 39 студентæн ын ахæм стипендитæ кæй снысан кодтой, уыцы ног хабар. Уæрæсейы Федерацийы Президенты стипенди райстой æппæты стырдæр – дзæбæхгæнæн факультеты – студенттæ æмæ педиатрон факультеты иу студенткæ. Уæрæсейы Федерацийы Хицауады стипенди саккаг кодтой дзæбæхгæнæн факультеты 17 фидæны дохтырæн, 6 та – педиатрон æмæ стоматологион факультеты студенттæн.
Уыцы æхсызгон цауы тыххæй ахуырадон уагдоны разамонæг Олег Ремизов загъта: «Мах æппындæр дызæрдыг нæ кæнæм, ацы курдиатджын чызджытæ æмæ лæппутæ, академи каст фæуыны фæстæ нæ бæстæ æмæ дунеон медицинон стъалытæ кæй суыдзысты æмæ сæ уарзон ахуыргæнæндонæн кад кæй скæндзысты. Махæн, кæй зæгъын æй хъæуы, тынг æхсызгон у, нæ академийы афтæ бирæ кадджын стипендиаттæ кæй ис, уый. Æвæццæгæн, нæ бæстæйы уæлдæр ахуыргæнæндæтты ‘хсæн, бюджетон бынæттæ, æмткæй райсгæйæ, æппæты фылдæр мах студенттæн саккаг кодтой кадджын стипендитæ проценттæм гæсгæ. Ахæм бæрзонд бæрæггæнæнтæ къухы бафтыдысты, наукон-педагогон коллектив 90 азы дæргъы, традицитæн аргъгæнгæйæ, уæрæхдæр æмæ арфдæр кæй кæны фидæны дохтырты зонындзинæдтæ æмæ дæсныйады сусæгдзинæдтæ фæлтæрдджын зондамонджытæ, педагогтæ, тьюторты разамындæй. Нæ студенттæ сæ зæрдыл дарынц æмæ æххæст кæнынц наукæ æмæ уæлдæр ахуырады министр Валерий Фальковы ныстуан Уæрæсейы студенттæн: «Зындзинæдтæй ма тæрсут, алкæддæр агурут гæнæнтæ сæ сæрты ахизынæн, æмæ уæд, æнæмæнг, уыдзыстут æнтыстджын æмæ амондджын адæймæгтæ».
Цæгат Ирыстоны Медицинон академийы пресс-службæ
