Республикæйы Сæргълæууæг Сергей МЕНЯЙЛО сарæзта координацион советы æмбырд «Фыццæгты змæлд», зæгъгæ, сывæллæтты æмæ фæсивæды ацы æппæтуæрæсеон æхсæнадон-паддзахадон змæлдимæ æмархайды фарстаты фæдыл.
Æмбырды архайдтой республикæйы Хицауады Сæрдары хæдивæг Алыбегты Эллæ, наукæ æмæ ахуырады министры хæстæ
рæстæгмæ æххæстгæнæг Андрей Швецов, культурæйы министры хæстæ рæстæгмæ æххæстгæнæг Гуыдиаты Батрадз, Фæсивæды хъуыддæгты комитеты сæрдар Джусойты Руслан, депутаттæ, змæлды раззагдæр архайджытæ.
Æмбырд гом кæнгæйæ, Сергей Меняйло куыд бафиппайдта, афтæмæй рæзгæ фæлтæримæ æнгом хъомыладон куыст у паддзахадон политикæйы ахсджиагдæр фæзилæнтæй иу.
– Рæзгæ фæлтæры удварны хуыздæр миниуджыты бындурыл хъомыл кæнын у паддзахады размæцыды ахсджиагдæр нысан. Нæ хæс у хъуыддагæн канд ныхасæй æххуыс кæнын нæ, фæлæ аразын ахæм уавæртæ, цæмæй фæсивæд æмхиц кæной æмæ зæрдиагæй архайой нæ республикæйы æмæ нæ бæстæйы æхсæнадон-политикон царды. Фæсивæды хъуамæ хъусæм æмæ, закъоны бартæ, сæрибартæ æмæ интерестæ хъахъхъæныны фæдыл ахсджиаг уынаффæтæ хæсгæйæ, сæ хъуыды нымайæм æмæ йын аргъ кæнæм, –загъта Сергей Меняйло.
Республикæйы Сæргълæууæг бафиппайдта, уыцы хæстæ æххæст кæныны хъуыддаджы змæлд «Фыццæгты змæлд» разæнгардæй кæй архайы, æмæ фæбæрæг кодта, змæлдæн йæ хъомыладон нысаниуæг æмæ иннæ фæсивæдон организацитимæ æнгом баст кæй у, уый.
Уымæй уæлдай, Сергей Меняйло арфæ ракодта змæлды разæнгарддæр архайджытæн, ныридæгæн дæр цы куыст бакодтой, уый фæдыл æмæ сын зæрдæ бавæрдта, сæ хорз хъæппæристæн республикæйы ‘рдыгæй дарддæр дæр кæй уыдзæн æххуыс.
Змæлды регионалон хайады советы сæрдар Хъесаты Ирыстон æрныхас кодта организацийы куысты бæрæггæнæнтыл æмæ фæнысан кодта фидæны пълантæ.
Абоны бонмæ Цæгат Ирыстоны ахуыргæнæндæтты æмæ куыстуæтты кусынц змæлды 241 фыццаградон хайады. Сæ архайджытæ сты 94 мин ахуыргæнинаг æмæ хъомылгæнæгæй фылдæр. Афæдзы дæргъы регионалон хайад сарæзта бирæ мадзæлттæ – тематикон фембæлдтытæ, радтæ, ахуырадон, культурон, патриотон æмæ æхсæнадон проекттæ. Уымæй уæлдай, республикæйы скодтой æфсæддон-патриотон хъазт «Зарница 2.0»-ы кæронбæттæн хай. Архайдтой дзы Цæгат Ирыстоны командæтæ дæр.
РЦИ-Аланийы Сæргълæууæг æмæ Хицауады пресс-службæ
