Нæ паддзахад фæфидар кæныны хъуыддажы «Иугонд Уæрæсе» алкæддæр ахста сæрмагонд бынат. Нæ бæстæйы рæзтæн, экономикæйы, социалон къабазы размæцыдæн ахъазгæнæг вазыгджын уынаффæтæ хæссын дæр-иу æй арæх бахъуыд. Уыимæ, хъуыддæгтæ æнцонтæй лыг кæндзысты, зæгъгæ, ахæм ныфсытæ дæр адæмæн никуы æвæрдта. Ацы ныхæстæ загъта Уæрæсейы Президент Владимир ПУТИН политикон партиты разамонджытимæ фембæлды рæстæг.
– Ног равзæрст Паддзахадон Думæйы дæр афтæ кæй уыдзæн, ууыл зæрдæ дарын, – бафиппайдта Президент. Стæй загъта, «Иугонд Уæрæсе» иннæ фракцитимæ, раздæрау, æмархайд кæй хъуамæ кæна, уый.
– Æвзæрстыты чи архайдта, фæлæ Паддзахадон Думæмæ чи нæ рацыд, уыцы партитимæ æмгуыстад дæр уыдзæн пайдайаг. Цы хорз хъæппæристæ сæм уыд, уыдонмæ хъæуы æргом аздахын. Афтæмæй, уыцы хуызы архайгæйæ æмæ, нæ бæс-
тæйы фидæнмæ хæрззæрдæ чи дары æмæ йæ хорздзинадыл архайын кæй фæнды, уыцы политикон тыхтæ, структурæтæ æмæ граждайнаг æхсæнад баиу кæнгæйæ, арæзт хъуамæ цæуа нæ куыст, – загъта Владимир Путин.
«Иугонд Уæрæсе»-йы Сæрдар Дмитрий Медведев куыд фехъусын кодта, афтæмæй парти йæхицæн фыццаг хæсæн æвæры Адæмон
программæ æххæст кæнынæн закъонæвæрынадон бындуртæ аразын.
– Адæмы программæмæ хаст чи æрцыд, æппæт уыцы нысантæ дзуапп дæттынц, нæ бæстæйы размæ абон цы къуырцдзæвæнтæ æвæрд цæуынц, уыдон аиуварс кæнынæн. Уыдон баст сты экономикæимæ, социалон къабазимæ, демографиимæ, ахуырадимæ, æнæниздзинад хъахъхъæнынадимæ, регионтæн сæ рæзтæн æмхуызон уавæртæ аразынимæ, технологон æгъдауæй Уæрæсе размæ ракæнынимæ, – загъта Дмитрий Медведев.
Йæ ныхасмæ гæсгæ, ног равзæрст Паддзахадон Думæйы «Иугонд Уæрæсе» сæйраг æргом здахдзæн сæрмагонд æфсæддон операцийы архайджытæн æмæ сæ бинонтæн æххуыс кæнынмæ, стæй нæ бæстæйы историон территориты рæзтмæ. Уыдоны рæзт, Президенты уынаффæмæ гæсгæ, 2032 азмæ хъуамæ сæмхуызон уа уæрæсейаг иннæ территориты рæзтимæ.
Дмитрий Медведев Президентæн зæрдæ бавæрдта, иннæ политикон партитимæ «Иугонд Уæрæсе» æмгуыст кæй кæндзæн, уымæй.
Æрæджы кæронмæ чи ахæццæ, уыцы æвзарæн кампанийы «Иугонд Уæрæсе» райста æвзарджыты хъæлæсты 58 проценты – раздæр чи никуыма уыд, уый бæрц. Уыимæ, Владимир Путины уынаффæ æххæст кæнгæйæ, æвзарæн кампанимæ се ‘ргом раздахын кодта сæрмагонд æфсæддон операцийы архайджытæн. Афтæмæй, нæ хæстонтæй 50 адæймаджы систы фракцийы уæнгтæ Паддзахадон Думæйы.
Дмитрий Медведев бавдыста Вячеслав Володины кандидатурæ Паддзахадон Думæйы Сæрдарæй равзарыны фæндон. Уыцы фæндоны фарс рахæцыд нæ бæстæйы Президент Владмир Путин дæр.
ДЕДЕГКАТЫ Зæлинæ
