Уæрæсейы паддзахадон академион Стыр театры, 12 майы, уыдис Советон Цæдисы адæмон артисткæ, Уæрæсейы паддзахадон академион Стыр театры аивадон советы уæнг æмæ балетмейстер-репетитор, нæ зындгонд æмзæххон, АДЫРХАТЫ Светланæйы юбилейон изæр. Стыр театры солисткæ Адырхаты Светланæ хауы балетон сценæйы цытджындæр кафджытæм. Йæ ном ын бахастой дунейы æппæт балетон энциклопедитæм, йæ разамындæй ныртæккæ рæзынц æмæ сæхи ахуыр кæнынц Стыр театры æрыгон артисттæ.
Адырхаты Светланæйæн арфæ ракæныны охыл Мæскуымæ ацыд цæгатирыстойнаг делегаци, йæ уæнгтæ уыдысты РЦИ-Аланийы Сæргълæууæг Битарты Вячеслав, Хуссар Ирыстоны Президент Бибылты Анатоли, Цæгат Кавказы хъуыддæгты фæдыл министры хæдивæг Хацъæты Олег, Парламенты Сæрдары фыццаг хæдивæг Тотоонты Алыксандр, Хицауады Сæрдары хæдивæг Дзанайты Барис, Дзæуджыхъæуы сæргълæууæг Хæдарцаты Махарбег æмæ æндæр бæрнон адæймæгтæ. Юбилейон изæрмæ æрбацыдысты Мæскуыйы цæрæг ирæттæ, культурæ æмæ аивады архайджытæ.
Цæгат Ирыстоны цæрджыты номæй Адырхаты Светланæйæн арфæ кæнгæйæ, республикæйы Сæргълæууæг куыд бафиппайдта, афтæмæй йæ райгуырæн бон ахсджиаг æрмæст дунеон балеты историйæн нæу, фæлæ нæ республикæйы цардæн дæр. «Мах кæддæриддæр дæуæй уыдыстæм сæрыстыр, æхсызгон нын у, ахæм зындгонд кафæг нæ зæххыл кæй райгуырдис, уый. Аргъ кæнæм уымæн дæр, æмæ, кæд тынг æнæвдæлон вæййыс, уæддæр Ирыстонимæ дæ бастдзинад никуы аскъуыдтай. Дæ чысыл Фыдыбæстæмæ æрласыс Стыр балеты зындгонддæр кафджыты, уæ репертуары кæддæриддæр вæййынц национ сюжеттæ. Адæмæн æппæт уыцы хъуыддæгтæй сæ зæрдæтæ балхæныс, уæдæ рæзгæ курдиæттæн цы амынддзинæдтæ радтыс, уыдонæн æмбал нæй», — загъта Битары-фырт.
Йæ ныхасмæ гæсгæ, Ирыстон кæддæриддæр тыхджын уыдис йæ Хъæбатыртæй, хæстон командæгæнджытæй, аивад æмæ спорты размæцыддæр минæвæрттæй. «Уыдон æрмæст нæ республикæйæн не сты кад æмæ намысы хос, фæлæ æппæт Уæрæсейæн дæр. Мах уырны, дæу хуызæн адæймæгты фæрцы, ды куыд аудыс курдиатджын сывæллæттыл, афтæмæй ма Ирыстоны фæзындзæн ноджы фылдæр арæхстджын кафджытæ, дунейы зындгонддæр фæзты не стыр бæстæйæн кад чи кæндзæн, ахæм мастертæ», — фæнысан кодта республикæйы Сæргълæууæг. Уый зæрдиаг арфæтæ ракодта Адырхаты Светланæйæн æмæ фехъусын кодта, Дзæуджыхъæуы Минæвæртты æмбырды уынаф- фæйæ, Адырхаты Дзантемыры чызг Светланæ «Дзæуджыхъæуы кадджын гражданин» кæй ссис, уыцы цау. Номдзыд балеринæйы юбилейон изæр ацыдис æнтыстджынæй, дыууæ хайæ конд концерты акафыдысты зындгонд Екатеринæ Крысанова, Анастасия Сташкевич, Екатеринæ Завадина, Денис Савин, Руслан Скворцов, Игорь Цвирко, Денис Ротькин, Владислав Лантратов, Вячеслав Лопатин, Иван Васильев, Семен Чудин. Уыдон скъуыддзæгтæ равдыстой балеттæ «Эсме- ральда», «Пламя Парижа», «Баядерка», «Легенда о любви», «Щелкунчик», «Спартак», «Спящая красавица», «Дон Кихот»-æй. Уыцы спектакльты йæ заманы кафыди Адырхаты Светланæ.
Юбилейон программæйы режиссер уыдис Уæрæсейы паддзахадон академион Стыр театры балетон труппæйы разамонæг Уазиты Махар, дирижер та уыдис Павел Сорокин. Адæмон кафты ансамбль «Маленький джигит» дæр акафыд ацы историон сценæйы, Гæбæраты Ильяйы музыкæмæ гæсгæ Адырхаты Светланæйæн бацæттæ кодтой сæрмагонд кафт. Хъуыддæгтæ конд æрцыдысты РЦИ-Аланийы Сæргълæууæджы æмæ Уæрæсейы Федерацийы Президенты цур Цæгат Ирыстоны Æххæстбарджын минæварады фæрцы.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
