Уӕрӕсейы Федерацийы мидхъуыддӕгты оргӕнты кусджыты бон знон кадджын уавӕры сбӕрӕг кодтой Республикӕ Цӕгат Ирыстон-Аланийы дӕр. Тӕбӕхсӕуты Балойы номыл паддзахадон Ирон академион театры агъуыстмӕ ӕрӕмбырд сты республикӕйы мидхъуыддӕгты оргӕнты ветерантӕ, абоны раззагдӕр кусджытӕ. Сӕ профессионалон бӕрӕгбоны фӕдыл сӕм арфӕ кӕнынмӕ ӕрбацыдысты Республикӕ Цӕгат Ирыстон-Аланийы Сӕргълӕууӕг БИТАРТЫ Вячеслав, РЦИ-Аланийы Парламенты Сӕрдар Алексей МАЧНЕВ, Цӕгат Кавказы федералон инспектор РЦИ-Аланийы Андрей БЕССОНОВ, республикӕйы барадхъахъхъӕнӕг оргӕнты разамонджытӕ.
Кадджын бӕрӕгбоны архайджытӕ бакастысты киноныв «Хъусынгӕнинаг постмӕ», уым ӕвдыст цыд республикӕйы мидхъуыддӕгты оргӕнты ивгъуыд ӕмӕ ӕрвылбоны архайды, Мидхъуыддӕгты министрады къухы ацы аз цы бирӕ зӕрдылдарӕн ӕмӕ мысӕн бынӕттӕ байгом кодта: «Барбашовы фӕз»- музей, сӕ хӕс ӕххӕстгӕнгӕйӕ чи бацарӕфтыд, уыдон мысӕн Мемориал Намысы Алеяйы, уыдоны тыххӕй ӕрмӕг.
Республикӕйы Мидхъуыддӕгты министр Михаил Скоков йӕ цыбыр раныхасы бӕрӕгбоны фӕдыл арфӕ ракодта мидхъуыддӕгты оргӕнты ветерантӕн, абоны службӕгӕнджытӕн. Бузныг загъта сӕ зын, фӕлӕ кадджын хӕс ӕххӕстгӕнгӕйӕ ӕдзухдӕр сӕ фарсмӕ чи ӕрбалӕууы, уыдонӕн: Республикӕйы Сӕргълӕууӕг Битарты Вячеслав, РЦИ-Аланийы Парламенты Сӕрдар Алексей Мачнев, республикӕйы барадхъахъхъӕнӕг оргӕнты разамонджытӕн.
Бӕрӕгбон ӕнӕ хорзӕхтӕ ӕмӕ лӕвӕрттӕ нӕ вӕййы. Михаил Скоков ӕхсызгонӕй бакаст, Уӕрӕсейы мидхъуыддӕгты министр Владимир Колокольцевы бардзырдмӕ гӕсгӕ Ирыстоны мидхъуыддӕгты оргӕнты хуыздӕр кусджытӕй хорзӕхджынгонд чи ӕрцыд, уыдоны нӕмттӕ. Номылдаргӕ хӕцӕнгарз — кортик лӕвӕрд ӕрцыд РЦИАланийы мидхъуыддӕгты пъӕлицӕйы хицауы хӕдивӕг, булкъон Альберт Сабанаевӕн.
Уӕрӕсейы Федерацийы мидхъуыддӕгты майдан «За доблесть в службе»-йӕ хорзӕхджынгонд ӕрцыдысты: оперативон-агурӕг хайады хицау, пъӕлицӕйы булкъон Михаил Дьяченко, ӕрыдоны районы пъӕлицӕйы хицауы хӕдивӕг, пъӕлицӕйы дӕлбулкъон Быгъуылты Барис, Кировы районы пъӕлицӕйы хицауы хӕдивӕг, пъӕлицӕйы майор Болататы Эльбрус, РЦИ-Аланийы Мидхъуыддӕгты министрады культурон центры хицау Хъӕрджынты Анжелӕ. Уӕрӕсейы Федерацийы Мидхъуыддӕгты министрады майдан «За боевое содружество»- йӕ хорзӕхджынгонд ӕрцыдысты Мидхъуыддӕгты министрады уголовон агурджыты ӕххӕстбарджын, пъӕлицӕйы дӕлбулкъон Гаситы Алан ӕмӕ республикӕйы Мидхъуыддӕгты министрады 1 хайады хицау, пъӕлицӕйы дӕлбулкъон Гӕззаты Алыксандр.
Уӕрӕсейы Мидхъуыддӕгты министрады Арфӕйы гӕххӕттытӕ ӕмӕ Кады грамотӕтӕй хорзӕхджынгонд ӕрцыдысты дыууадӕс адӕймаджы.
Пъӕлицӕйы кусджытӕн сӕ профессионалон бӕрӕгбоны фӕдыл зӕрдиаг арфӕтӕ ракодта Битарты Вячеслав ӕмӕ йӕ бардзырдмӕ гӕсгӕ РЦИ-Аланийы Кады грамотӕтӕй схорзӕхджын кодта Республикӕ Цӕгат ИрыстонАланийы Мидхъуыддӕгты министрады экстремизмы ныхмӕ тохы центры хицау Гӕдиаты Асланы, Мидхъуыддӕгты министрады уголовон агурӕг управленийы хайады хицау Джиоты Раманы ӕмӕ Мӕздӕджы районы пъӕлицӕйы хайады хицау Ашот Ковхоянцы.
Республикӕ Цӕгат Ирыстон-Аланийы Парламенты Кады грамотӕтӕй хорзӕхджын ӕрцыдысты РЦИ-Аланийы Мидхъуыддӕгты министрады пъӕлицӕйы хицауы хӕдивӕг, пъӕлицӕйы булкъон Наниты Роберт ӕмӕ республикӕйы Мидхъуыддӕгты министрады уголовонагурӕг управленийы хицау, пъӕлицӕйы булкъон Цхуырбаты Роланд.
Республикӕйы мидхъуыддӕгты оргӕнты кусджытӕн сӕ профессионалон бӕрӕгбоны фӕдыл сӕ зӕрдӕтӕ барухс кодтой Цӕгат Ирыстоны курдиатджындӕр артисттӕ.
КАСАТЫ Батрадз
