Нӕ газеткӕсджытӕ ӕнӕзонгӕ не сты, Цӕгат Ирыстоны республикон ӕхсӕнадон змӕлд «Иудзинад» ацы аз 15 февралӕй 15 маймӕ гом конкурс кӕй расидт Ирыстоны адӕмон хъӕбатыр Гуырцъыты Пипойы цыртдзӕвӕнӕн хуыздӕр проект саразыны тыххӕй, уый. Йӕ нысан у адӕмон хъӕбатыры ном сӕнусон кӕнын, стӕй йӕ фӕзминаг миниуджытыл кӕстӕр фӕлтӕры минӕвӕртты ахуыр кӕнын.
Конкурсы уавӕртӕм гӕсгӕ дзы архайдтой физикон ӕмӕ юридикон адӕймӕгтӕ, уыимӕ: проектон организацитӕ, ӕрмадзтӕ ӕмӕ студентты сфӕлдыстадон коллективтӕ, архитектортӕ, дизайнертӕ, нывгӕнджытӕ, архитектурон ӕмӕ аивадон ахуыргӕнӕндӕтты студенттӕ ӕмӕ амынд ӕмгъуыдты бацӕттӕ кодтой 13 скульптурон уацмысы.
Конкурсон къамис ацы куыстытӕм сфӕлдыстадон цӕстӕй ӕркаст фыццаг къӕпхӕны, ӕмӕ цыртдзӕвӕны хицӕн эскизон проектты хъӕндзинӕдтӕ аиуварс кӕныны ӕмӕ сӕм ивддзинӕдтӕ бахӕссыны фӕстӕ къорд проекты уагъд ӕрцыдысты конкурсы дыккаг къӕпхӕнмӕ ӕркӕсынмӕ.
Гуырцъыты Пипойы цыртдзӕвӕны эскизон проекты фӕдыл сӕ хъуыдытӕ загътой Цӕгат Ирыстоны республикон ӕхсӕнадон змӕлд «Иудзинад»-ы советы ӕмӕ конкурсон къамисы уӕнгтӕ Мӕрзойты Тамерлан, Токты Валодя, Цгъойты Тамерлан, Фӕрниаты Эльбрус ӕмӕ ӕхсӕнады координатор Байсонгъуырты Мухтар. Дарддӕр жюрийы уӕнгтӕ Гуырцъыты Пипойы цыртдзӕвӕнӕн эскизон проекттӕ саразыны тыххӕй сбӕрӕг кодтой конкурсы уӕлахиздзауты. Фыццаг бынат бацахста, ӕмӕ 25 мин сомы лӕвӕрд ӕрцыд Цӕргӕсты Олегӕн, дыккаг бынатмӕ рацыд ӕмӕ 15 мин сомы райста Дзукъаты Николай, ӕртыккаг бынат ӕрхауд Цъӕхилты Сергеймӕ ӕмӕ йын лӕвӕрд ӕрцыд 10 мин сомы.
Ныр та эскизон проекттӕ ӕрвыст ӕрцыдысты Дзӕуджыхъӕуы бынӕттон хиуынаффӕйады администрацийы сӕрмагонд къамисмӕ, ӕмӕ хуыздӕр проекты бындурыл Гуырцъыты Пипойы цыртдзӕвӕн рӕхджы арӕзт ӕрцӕудзӕн Дзӕуджыхъӕуы Кутузовы уынджы кӕрон.
ТОХСЫРТЫ Къоста
