Ирыстоны адæмæн уарзон æмæ зындгонд у Цæгат Ирыстоны адæмон нывгæнæг, дæсны кафæг, публицист, актер ГАСЫНТЫ Жорж. Уый 40 азæй фылдæр нæ культурæйæн лæггад кæны удуæлдайæ. Цы хъуыддаджы сæр æрлæууы, уый кæны бæлвырд æмæ бæстон. Куыд нывгæнæг, афтæ йæ курдиат иннæ нывгæнджыты æрмдзæфæй хицæн кæны. Фылдæр архайы портреты æмæ пейзажы жанрты. Ис æм нæ фыдæлты цардыл дзурæг куыстытæ дæр. Нæ аивады хæрзæбонæн йæ рухстауæн архайд куыд бирæвæрсыг у, уый æхсызгондæрæй æмæ хуыздæр базонын кæй фæнды, уыдонæн ис хорз фадат. Рауагъдад «Терские ведомости»-йы мыхуыры рацыд йæ репродукциты, йæ цардыл æмæ сфæлдыстадон архайдыл дзурæг къамты альбом «Жорж Гасинов». Мыхуырмæ йæ бацæттæ кодта журналист, æхсæнадон архайæг, йæ редактор æмæ рауадзæг ТАУТИАТЫ Хъазыбег
Къамты альбоммæ нывгæнæджы аивадон куыстытæй уæлдай хаст æрцыдысты Жоржы бирæвæрсыг æхсæнадон, йе сфæлдыстадон архайдыл алы азты нæ бæстæйы, Ирыстоны аивадиртасджытæ, журналисттæ цы мидисджын уацтæ фæфыстой, стæй, йæ нывты равдыстыты фæдыл фæсарæйнаг, уæрæсеаг æмæ ирон нывгæнджытæ, аивадуарзджытæ цы хъуыдытæ загътой, уыдон. Альбомы ма бакæсæн ис, Жорж кæй сарæзта, бирæ азты дæргъы арæхстджын разамынд кæмæн лæвæрдта, уыцы фольклорон ансамбль «Цин»-ы сфæлдыстадон архайды тыххæй æрмæджытæ, фенæн ис ансамблы архайджыты къамтæ, сæ хæрзиуджытæ республикон, уæрæсеаг æмæ дунеон фестивальтæй æмæ конкурстæй.
Жорж канд кæттагыл нæ ныв кæны. Фæлæ ма дæсны у сценикон уæлæдарæс ныв кæнынмæ дæр. Ахæм хореогафион, профессионалон, хихъхъæппæрисадон ансамбль стæм ис, куыд Хуссар, афтæ Цæгат Ирыстоны, Гасыны-фырт сфæлдыстадон æххуыс кæмæн нæ бакодта. Уæдæ нæ уæзæджы дыууæ хайыл уæззау бонтæ куы скодта, уæд Жорж уыд кæддæриддæр, куыд сфæлдыстадон кусæг, йæ адæмы фарсмæ. Гуманитарон æххуысимæ-иу балæууыд Цхинвалы, Хуссар Ирыстоны иннæ районты, нæ республикæйы Горæтгæрон районы.
Йæ зæрдæйы, зонды æмæ уды цы фарн ис, уый дзыллæмæ хæссы публицистон уацты хуызы. Уыдон фыст вæййынц иттæг аив ирон æмæ уырыссаг æвзæгтыл. Къамты альбоммæ дзы хаст æрцыд, Жорж республикон газетты æмæ журналты цы уацтæ ныммыхуыр кодта, уыдонæн сæ цымыдисагдæртæ: «Чи уыд кадджыты Бидас?», «Загадки и открытия скифской истории», «Поэт, гражданин, воин», «Таргитай æви Заратуштрæ», «О Египетских невольниках — Мамлюках » , «Возвращение к истокам», «Луч надежды и света», «Одежда-зеркало сути женщины», «Хызы фидар: миф æви æцæгдзинад?» «Нæ рагфыдæлты тырыса», «Дзывгъисы диссæгтæ», «О древних памятниках культуры», «Чепена» æмæ æндæртæ.
Жоржы сфæлдыстадон альбоммæ чи æркæса, уый, æнæмæнгæй, банкъардзæн, арф, аналитикон зондыл, иртасыны курдиатыл фидар хæст кæй у, уый. Уыимæ, йæ бирæвæрсыг курдиат исты æнхъæлæй адæммæ фæзынфæзынгæнгæ, мургай нæ дæтты. Уый та дзурæг у, Жорж йæ адæмы æцæг хъæбулы уарзтæй кæй уарзы, ууыл. Æмæ сын хорзы дæр бонзонгæйæ кæй цæуы. Йæ уды æмæ зæрдæйы æппæт хорзæхтимæ ма йæм рахатыдтам иу ахъаззаджы хорздзинад. Ис аивады кусджытæ æмæ зонгæ бирæ кæнынц, уарзынц сæ куыст, аргъ сын кæнынц адæм, фæлæ, цы зонынц, цы архайынц, уый альбомы, чиныджы, кæнæ уацы хуызы адæммæ рахæссой, фæлтæртæн æй ныууадзой, уый сæ бон нæ вæййы. Мæ ацы хъуыды се ‘ппæт аивадон кусджытæм нæ хауы. Зæгъæм, йæ фæстæ бирæ фыст æрмæг ныууагъта Тугъанты Махарбег, Дзанайты Азанбег, газет «Рæстдзинад»-ы йæ мидисджын уацтæ арæх мыхуыры рацæуынц зындгонд скульптор, РЦИ-Аланийы адæмон нывгæнæг, Хетæгкаты Къостайы номыл премийы лауреат Дзбойты Михалæн. Нæ газеты иузæрдион хæлар уыд зындгонд кафæг, этнограф Дзаттиаты Уакка. Уæдæ нæм редакцимæ Гасынты Жорж куы æрбацæуы йæ радон æрмæгимæ, уæд нын вæййы æхсызгон. Йæ уацхъуыд газет «Рæстдзинад»-ы куы рацæуы, уæд нæм телефонæй адæм сæ арфæтимæ æрбадзурынц.
Ныр йе сфæлдыстадон бынты иу хай сæрмагонд къамты альбомæй рухс кæй федтой, уый нымайæм стыр хорздзинадыл. Стыр ахъаз уыдзæн аивадуарзджытæн, историктæн, этнографтæн, культурологтæн, журналисттæн, ахуыргæнджытæ æмæ скъоладзаутæн. Йæ тираж у 500 экземпляры. Зындгонд нывгæнæг Гасынты Жоржæн æмæ йын ахæм хъæздыг, мидисджын, аив чиныг-фотоальбом чи рауагъта, уыдонæн нæ зæрдæ зæгъы ног сфæлдыстадон æнтыстдзинæдтæ!
ГАСАНТЫ Валерии
