Оперӕ ӕмӕ балеты театры артистты концерт
Оперон ӕмӕ балетон къордты солисттӕ, стӕй зарӕггӕнджыты къорд кӕм архайдтой, ахӕм мидисджын концерт равдыстӕуыд Дзӕуджыхъӕуы ӕрбынӕттон уӕвӕг Оперӕ ӕмӕ балеты театры — Петербурджы Марияйы театры цӕгатирыстойнаг хайады — сценӕйыл
Концерт байгом кодта дунеон конкурсы лауреат Михаил Павлов (баритон), азарыд Вольфганг Амадей Моцарты оперӕ «Дон Жуан»-ӕй Дон Жуаны серенадӕ.
Аивадуарзджытӕм кадджын чи у, фӕстӕдӕр та уырыссаг ӕмӕ фӕсарӕйнаг композиторты оперӕтӕй уыцы аритӕ ӕмӕ дуэттӕ акодтой Бекъойты Вано, Тайсауты Олег, Хуыгаты Ибрагим (иууылдӕр — тенортӕ), Геворг Григорян, Джиоты Алан (дыууӕ дӕр — баритонтӕ), Аннӕ Бабаян, Динарӕ Григорян, Ольгӕ Борисова, Маринӕ Нетребина (иууылдӕр — сопранотӕ), стӕй Кристинӕ Деревянко ӕмӕ Цхуырбаты Верӕ (дыууӕ дӕр — меццосопранотӕ).
Аивадуарзджытӕ музыкӕйы ӕхцон зӕлтӕ ӕмӕ зарӕггӕнджыты рӕсугъд хъӕлӕстӕй разыйӕ баззадысты. Зарӕггӕнджыты къорд акодта Джузеппе Вердийы, Антон Рубинштейн ӕмӕ Петр Чайковскийы оперӕтӕ «Травиатӕ», «Демон» ӕмӕ «Евгений Онегин»-ӕй зарджытӕ, балеты артисттӕ та равдыстой Илья Устьянцев ӕмӕ Суанты Валерийы ӕвӕрдӕй балеттӕ «Танго без тебя» ӕмӕ «Портрет Дориана Грея»-йӕ нывтӕ.
Концерты кӕрон Динарӕ Григорян ӕмӕ Хуыгаты Ибрагим театры зарӕггӕнджыты къордимӕ акодтой Луиджи Денцы зындгонд неаполитайнаг зарӕг «На качелях».
ПЛИТЫ З. Къам систа УАНЕТЫ Ланӕ
