Национ наукон библиотекæйы уыд чиныг «Дæ намыс, дæ хъару æнустæм цæрæд » Рæстдзинад»-ы презентаци. Архайдтой дзы ЦИПУ-йы æмæ Абайты Васойы номыл гуманитарон æмæ социологон иртасæнты институтты ахуыргæндтæ, газет «Рæстдзинад»-ы редакцийы кусджытæ, æхсæнады минæвæрттæ, чиныгкæсджытæ, студенттæ æмæ скъоладзаутæ. Ног чиныг мыхуыры рацыд газет «Рæстдзинад»-ы 95 азы юбилеймæ. Бацæттæ йæ кодтой профессортæ ТЕДТОЙТЫ Зинаидæ, ХЪАНЫХЪУАТЫ Зæлинæ, газет «Рæстдзинад»-ы сæйраг редактор БИТАРТЫ Маринæ (уый у чиныджы наукон редактор) æмæ йæ хæдивæг КОЛЫТЫ Иринæ. Хаст æм æрцыдысты газеты равзæрды историйыл, йæ редакторты, йæ абоны журналистты сфæлдыстадон архайды тыххæй цымыдисаг æрмæджытæ æмæ къамтæ.
Презентацийы райдайæны уазджытæн зæрдиаг æгас цæуай загъта газеты сæйраг редактор, филологон наукæты кандидат Битарты Маринæ. Уый афæлгæсыд, газеты алы азты сæйраг редактортæй чи куыста, адæмы æмæ æхсæнады цæсты йæ кадджын чи кодта, уыдоны сфæлдыстадон фæндагыл. Уый та ууыл дзурæг у, æмæ газет «Рæстдзинад»-ы редакцийы сæргъы лæугæйæ, Маринæ дарддæр кæй хæццæ æмæ фидар кæны, газеты алы азты цы æгъдæуттæ ныффидар, уыдон. Уый нæ, фæлæ ма сыл æфтауы.
— Газет «Рæстдзинад»-ы 95 азы юбилеймæ чиныг кæй рацыд, уый тынг хорз у, уымæн æмæ газет ирон журналистикæйы историйы, ирон адæмы царды ахсы иуыл ахсджиагдæр бынат — загъта презентацийы рæстæг ЦИПУ-йы ирон филологийы факультеты декан, доцент Хозиты Барис. — Цард ивы, уыимæ та, бæстæйы æмæ адæмы зондахаст. Газет «Рæстдзинад» дæр рæстæгимæ кæны æмкъахдзæф, фæлæ нæ ивы йæ ном, æмæ йыл нæ Иры адæм цы хæс сæвæрдтой, уыцы нысаныл — нæ дзыллæйы æхсæн рухс тауын, у йыл раздæрау æнувыд. Афтæ уыдзæн кæддæриддæр.
Æрæджы нæ университеты журналистикæйы факультетмæ ист æрцыд, иронау хъуыды æмæ сфæлдыстадон куыст кæнынмæ чи арæхсы , ахæм зæрдæргъæвд фæсивæд. Уыдон уыдысты уазæгуаты газет «Рæстдзинад»-ы редакцийы æмæ фидæны семæ æнгомдæр бастдзинад кæй дардзысты, редакцийы хæслæвæрдтæ æнæзивæгæй кæй æххæст кæндзысты, уый мæ уырны. Абон цы чиныгыл ныхас кæнæм, ахæм чингуытæ та уадзын хъæуы газеты алы юбилеймæ. Фæнды ма мæ, цæмæй редакци сног кæна газеты æхсæнадон уацхæсджытæн номдзыд рухстауæг, æхсæнадон архайæг Гæдиаты Цомахъы преми дæттыны арфæйаг хъуыддаг, — загъта Хозиты Барис.
Уый фæстæ раныхас кодта æмæ газеты историйы азфыстыл афæлгæсыд зындгонд журналист, этнограф, фыссæг, Хетæгкаты Къостайы номыл паддзахадон премийы лауреат, газет «Рæстдзинад»-ы хайады сæргълæууæг Цгъойты Хазби. Куыд бафиппайдта, афтæмæй газеты алы азты цы редактортæ, журналисттæ куыста, уыдонæй алчидæр йæ арфæйаг хуын бахаста газеты редакцийы фæрнæйдзаг сфæлдыстадон азфыстмæ. Зындзинæдтæй нæ тæрсгæйæ, цæлхдурты сæрты хизгæйæ сæ алчидæр архайдта, цæмæй газет «Рæстдзинад»-æн фидар кæна йæ хъомыс йæ ахадындзинад адæмы цæсты.
Цæгат Ирыстоны Фысджыты цæдисы номæй презентацийы раныхас кодта æмæ чиныгаразджытæн зæрдиаг арфæ ракодта цæдисы сæрдар РЦИ-Аланийы адæмон фыссæг Агънаты Гæстæн.
— Газет «Рæстдзинад» у, ирон фысджыты сфæлдыстад зæрдиагдæрæй нæ дзыллæйы æхсæн парахат чи кæны, уыцы газет. Йæ истори æвдисæг чиныджы рацыд та нын уымæ гæсгæ уæлдай æхсызгон у. Æмæ мæ бузныг зæгъын фæнды йæ саразджытæн Тедтойты Зинаидæйæн, Хъаныхъауаты Зæлинæйæн æмæ Колыты Иринæйæн. Мæ зæрдæ дарын æмæ раздæрау Фысджыты цæдисæн газетимæ йæ ахастдзинæдтæ фидар кæй уыдзысты, ууыл, — загъта Агънаты Гæстæн.
Презентацийы ма газет «Рæстдзинад»-ы кусджытæн сæ юбилейы æмæ ног чиныджы рацыды тыххæй зæрдиаг арфæтæ ракодтой Æппæтдунеон æхсæнадон змæлд «Иры Стыр Ныхас»-ы сæрдары хæдивæг Еналдыты Хъазыбег, æхсæнадон змæлд «Иудзинад»-ы уæнг Токты Валодя, (æхсæнады уæнгты номæй газеты редакцийæн уый скодта зæрдылдарæн лæвар), Ахуыргæнджыты рухстауæн архайды газет «Рæстдзинад»-æн цы ахадындзинад ис, уый тыххæй радзыдта Дзæуджыхъæуы Хетæгкаты Къостайы номыл 13-æм астæуккаг скъолайы директор, РЦИ-Аланийы сгуыхт ахуыргæнæг Сæлбиты-Колыты Иринæ.
Презентацийæн æмæ газет «Рæстдзинад»-ы 95 азы юбилейы кадæн цы кадджын мадзæлттæ арæзт æрцыд, уыдонæн бæлвырд хатдзæгтæ скодта газеты сæйраг редактор Битарты Маринæ. Æмæ загъта, кæддæриддæр нæ ирон адæм, нæ интеллигенцийы раззагдæр минæвæрттæ газетыл æнувыд кæй сты. Уый та, редакцийы кусджытыл садзы разæнгарды æмæ зæрдиагдæр куыстмæ разæнгардгæнæг базыртæ.
Презентаци саразынмæ æппæт фадæттæ кæй сарæзтой, уый тыххæй Маринæ арфæ ракодта Национ наукон библиотекæйы разамынд æмæ коллективæн. Цæгат Ирыстоны паддзахадон педагогон институты инструменталон ансамблы уæнгтæ презентацийы архайджыты зæрдæтæ барухс кодтой ирон музыкæйы зæлтæй.
АНВАРАТЫ В.
