Елхоты байгом, йӕ цард ӕмӕ фӕллойӕ йӕхицӕн ном чи скодта, уыцы ӕнтыстджындӕр кировӕгты Кады фӕйнӕг. Уыцы цауы фӕдыл кадджын ӕмбырд уыд районы Культурӕйы хӕдзары раз фӕзы.
«Кировы район зындгонд у, йӕ чысыл фыдыбӕстӕйыл ӕнувыд чи у, йӕ цард ӕмӕ куыстӕй районӕн ном чи кӕны, бирӕ ахӕм адӕймӕгтӕй. Не ‘мзӕххонты бирӕ фӕлтӕртӕ арф фӕд ныууагътой районы историйы. Абон дӕр та кад кӕнӕм нӕ курдиатджын ӕмзӕххонты къордӕн», — фӕйнӕг гом кӕнгӕйӕ, загъта районы администрацийы организацион хайады хицау Мамиаты Хъазыбег.
Кадджын ӕмбырды архайдтой ӕмӕ раныхас кодтой муниципалон оргӕнтӕ ӕмӕ ӕхсӕнадон организациты минӕвӕрттӕ.
Кировы районы муниципалон сконды сӕргълӕууӕг Нӕкуысаты Барис ӕвдисӕндартӕ радта 14 номинантӕн, сӕ нӕмттӕ районы Кады фӕйнӕгмӕ хаст кӕй ӕрцыдысты, уый фӕдыл. Уыдоны номхыгъды: паратхэквондойӕ дунейы фондз хатты чемпион Гӕззаты Спартак, сӕрмагонд грант «Цӕгат Ирыстоны культурӕйы хуыздӕр кусӕг» рамбулӕг Дудайты Давид, республикӕйы сгуыхт ахуыргӕнӕг Хъыбызты Раисӕ, дохтыр-онколог Милдзыхты Алан ӕмӕ иннӕтӕ.
Зӕгъын хъӕуы, Кады фӕйнӕг парти «Фыдыбӕстӕ»-йы бынӕттон хайады хъӕппӕрисӕй кӕй байгом, уый дӕр.
Кочиты Альбинӕ
