Нæ газеткæсджытæ куыд зонынц, афтæмæй 27 сентябры Цæгат Ирыстоны балцы уыдысты уæрæсейаг æмæ китайаг туристон компаниты минæвæрттæ. Уыдонимæ — Цæгат Кавказы хъуыддæгты фæдыл министры уынаффæгæнæг Станислав АРИСТОВ æмæ Китайы Туризмы хъуыддæгты фæдыл паддзахадон управленийы мæскуыйаг минæварады сæргълæууæг Чжао ХУНЦИН.
Ахæм кадджын уазджыты ссыд республикæмæ баст уыд, Цæгат Кавказы ног туристон маршрут «Великий шелковый путь» кæй байгом, уыимæ. Ног маршруты фыццаг бæлццæттæ систы уæрæсейаг æмæ китайаг туристон компаниты минæвæрттæ. Ацы бонты уыдон зонгæ кæнынц Цæгат Кавказы федералон зылды регионты географиимæ, культурæ æмæ традицитимæ. 27 сентябры балцы архайджытæ бабæрæг кодтой Цæгат Ирыстон. Уазджытæн республикæйы уыд бирæ цымыдисаг фембæлдтытæ, уыимæ, сæрмагондæй æрныхас кодтой РЦИ-Аланийы Сæргълæууæг Битарты Вячеславимæ. Уыцы бон изæрæй делегацийы уæнгтæ æмæ уæрæсейаг регионты минæвæрттæ Дзæуджыхъæуы бафыстой æмгуыстады фарстаты фæдыл меморандум. Уæрæсейы Федерацийы ‘рдыгæй документы сæ къухтæ бавæрдтой Цæгат Ирыстоны, Дагестаны, Цæцæны, Мæхъæлы, Кæсæг-Балхъар æмæ Хъæрæсе-Черкесты туризмы фарстатæм цæстдарæг ведомствоты разамонджытæ, Китайы ‘рдыгæй та — Чжао Хунцин. Фембæлды архайдта Цæгат Ирыстоны Хицауады Сæрдары хæдивæджы хæстæ рæстæгмæ æххæстгæнæг Александр Реутов. Вице-премьер йæ раныхасы куыд фæбæрæг кодта, афтæмæй Цæгат Кавказы æппæт регионтæн дæр тынг ахсджиаг у ацы документ. «Мах лæмбынæг нæ цæст дарæм, нæ дыууæ бæстæйы разамонджытæ æмархайды фарстатæм стыр æргом кæй здахынц, уымæ. Æмæ нын æхсызгон у, Уæрæсе æмæ Китайы бастдзинæдтæ бонæй-бон æнгомдæр æмæ хъомысджындæр кæй кæнынц, уый. Нæ уазджытæ республикæмæ цы хъуыддаджы фæдыл ссыдысты, уый дæр ахъаз уыдзæн нæ бæстæты ‘хсæн хæлардзинад æмæ экономикон ахастдзинæдтæ æнгомдæр кæнынæн», — загъта Александр Реутов. Чжао Хунцины ныхасмæ гæсгæ, Цæгат Кавказы культурæ æмæ истори китайæгтæн цымыдисаг сты, æмæ йæхи ‘рдыгæй æппæт дæр араздзæн, цæмæй йе ‘мбæстæгтæн фылдæр фадæттæ уа Уæрæсемæ туристон балцыты цæуынæн.
Нæ уацхæссæг
