Знон Хетæгкаты Къостайы номыл паддзахадон университеты йæ куыст райдыдта науконпрактикон конференци «Колмогоровы бакастытæ». Уый арæзт цæуы ныр 13-æм хатт. Фæархайынц дзы, математикæйы, информатикæйы, физикæйы, робототехникæйы, биологийы фарстатæ иртасыныл чи архайы, уыцы æрыгон ахуыргæндтæ, студенттæ æмæ скъоладзаутæ. Йæ саразыныл бацархайдтой Ахуырад æмæ наукæйы министрад, Хуссайраг математикон институт, Ахуырады кусджыты зонындзинæдтæ фылдæргæнæн республикон институт, Хетæгкаты Къостайы номыл паддзахадон университет.
Конференцийы пленарон æмбырды фыццаг раныхас кодта Хуссайраг математикон институты наукон кусæг,физикон-математикон наукæты кандидат Верæ Абатурова. Уый куыд загъта, афтæмæй ацы наукон æрвылазон форумы архайджыты нымæц азæйазмæ кæны фылдæр. “Æвзонг иртасджытæ дзы цы докладтæ бакæсынц, уыдоны тематикæ та кæны уæрæхдæр æмæ мидисджындæр.Фæстаг рæстæг нæ республикæйы хицауад дæр се ‘ргом аздæхтой æрыгон иртасджытæм, ис нæм сæрмагонд совет æмæ республикон преми. — загъта уый. — Уый та ууыл дзурæг у, æмæ фæсивæды ахуырадмæ æмæ зондахасты рæзтмæ бæрнон бынæтты кусджытæ куыдфæндыйы цастæй кæй нæ кæсынц. Ахæм ахаст та хъуамæ уе ‘ппæтыл дæр садза ныфсы разæнгардгæнæн базыртæ”. Конференцийы ма раныхас кодтой ЦИПУ-йы ректоры хæдивæг Туаты Бертæ,физикон-математикон наукæты доктор Махъоты Таймураз, РЦИАланийы ногдзауты æмæ сывæллæтты цæдисы сæрдар Мæргъиты Жаннæ, Ахуырады кусджыты зонындзинæдтæ фылдæргæнæн республикон институты ректор Исахъты Людмилæ. Конференцийы фæткмæ гæсгæ ма йæ архайджытæн арæзт æрцæудзæн зонадон конкурстæ, физикæйæ, робототехникæйæ, математикæйæ æмæ информатикæйæ та — олимпиадæ. Йæ уæлахиздзаутæ сбæрæг уыдзысты 16 февралы, æмæ сын кадджын уавæры ратдзысты Кады гæххæттытæ æмæ зæрдылдарæн лæвæрттæ.
ГАСАНТЫ Валери
ЦÆГÆРАТЫ Дауыты ист къам
