Урайлаг хæххон-металлургон компанийы Техникон университеты (ацы ахуыргæнæндон æрбынæттон Свердловскы областы горæт Уæллаг Пышмæйы) фарон бакалавриаты программæтæм гæсгæ ахуырад кæй райдыдта, уымæ гæсгæ цæгатирыстойнаг скъолаты рауагъдонтæн ис ацы æнæпаддзахадон Техникон университетмæ (йæ бындурæвæрæг у амынд компани) ахуыр кæнынмæ бацæуыны фадат.
Ацы аз цæгатирыстойнаг скъолатæ каст чи фæуыдзæн, уыцы скъоладзаутæй цыппар сæхи биноныг цæттæ кæнын райдыдтой иумæйаг паддзахадон фæлварæнмæ (ахуыр кæнынмæ конкурсы бындурыл кæй исдзысты, уый нымайгæйæ, фæлварæны бæрæггæнæнтæм гæсгæ æппæтæй фылдæр баллтæ чи æрæмбырд кæна, университетмæ райсдзысты уыцы адæймæгты). Ацы аз университет Дзæуджыхъæуы завод «Электроцинчы» кандидатурæтæн кæй рахай кодта, уыцы дыууæ бынатæй иумæ хъавы нæ республикæйы сæйраг горæты лицейы 11-æм къласы ахуырдзау Джызойты Георги. Лæппу йæхи биноныг цæттæ кæны фæлварæнтæм.
— Мæ рæстæг минутгай нымад у. Фæлварæнтæм мæхи кæй цæттæ кæнын, уымæ гæсгæ спортивон секцимæ дæр рæстæгмæ нæ цæуын. кæрон сæвæрын бахъуыд. Ахуырыл кæд бирæ хъарутæ хардз кæнын, уæддæр мæ размæвæрд хæс æппæт гæнæнтæй баххæст кæныныл бацархайдзынæн, — зыгъы лæппу.
Георгийы æмрæнхъ Наталья Акинина дæр йæ фыды – «Электроцинчы» сæйраг энергетичы – уынаффæмæ гæсгæ сфæнд кодта амынд университетмæ ахуыр кæнынмæ бацæуын.
Фарон июлы Урайлаг хæххон-металлургон компанийы корпоративон уæлдæр скъола райста Уæрæсейы Ахуырад æмæ наукæйы министрады паддзахадон аккредитацийы тыххæй æвдисæндар, дыууæ мæйы фæстæ та дзы бонæй ахуырад райдыдта. Цæгат Ирыстоны скъолатæ каст чи фæуыдзæн, ацы азæй фæстæмæ уыцы адæмæн дæр ис хуыздæр европæйаг стандарттæм гæсгæ арæзт уæлдæр скъолайы ахуырад райсыны фадат.
Гом акционерон æхсæнад «Электроцинчы» иумæйаг фарстатæй директор Дарчиты Мурат куыд загъта, афтæмæй ацы аз университет «Хуызджын згъæрты металлурги»-йы, стæй «Хæххон æмæ промышленнон куыстуæтты электрон ифтонггæрзтæ æмæ электрон хæдзарад»-ы къабæзтæм гæсгæ дзæуджыхъæуккаг куыстуаты студентты боныгон ахуырадæн рахай кодта дыууæ бынаты.
Афæдзы райдайæнæй нырмæ амынд дзæуджыхъæуккаг заводы кусджытæ республикæйы скъолаты æвзæрстой Техникон университетмæ ахуырадмæ арвитинаг лæппуты æмæ чызджыты. Иумæйаг паддзахадон фæлварæны бæрæггæнæнтæм гæсгæ хорз зонындзинадтæ чи равдиса, Ирыстонæй дард ран цæрынмæ æмæ дзы ахуыр кæнынмæ цæттæ чи у, стæй университет каст фæуыны фæстæ, урайлаг ахуыргæнæндоны ист зонындзинæдтæй пайда кæнгæйæ, цалдæр азы дæргъы «Электроцинчы» чи бакуса (бадзырды æууæлтæм гæсгæ студентты ахуырады аргъ бафиддзæн ацы завод), ахуырадмæ райсдзысты æрмæст ахæм лæппуты æмæ чызджыты. Ныртæккæ репетитортæ «Электроцинчы» хардзæй цыппар æвзæрст скъоладзауы цæттæ кæнынц фæлварæнтæм.
— Бæстæйы бирæ металлургон куыстуæтты нæ фаг кæнынц дæсны инженертæ æмæ æндæр специалисттæ. Куыстуæттæ сæ фидæны специалистты сæхæдæг кæй хъуамæ бацæттæ кæной, уæлдæр ахуырад та ныры технологитæй бирæ раздæр кæй хъуамæ цæуа, уыдæттæ Урайлаг хæххон-металлургон компани рагæй рахатыд. Ацы фарстатæ алыг кæныны нысанимæ сарæзтой хи корпоративон университет. Компанийы, Техникон университет кæй цæттæ кæны, уыцы специалисттæ лыг кæндзысты ахсджиаг куыстадон фарстатæ, канд уый нæ, фæлæ ма техникон рæзты дарддæры нысантæ дæр бæлвырд кæндзысты, — зæгъы Дарчийы-фырт.
Иумæйаг паддзахадон фæлварæнæй фæстæмæ абитуриенттæм æнхъæлмæ кæсы психологион фæлварæн дæр. Техникон университетмæ ахуырадмæ райсынæн «Электроцинчы» кусджыты цотæн уæлæмхасæн бартæ нæй. Уыцы-иу рæстæг «Электроцинчы» специалисттæ скъоладзауты æхсæн иннæ азы абитуриентты дæр агурын райдыдтой.
Тауаситы Людмилæ
