Рахизфарсы районы адæмон кафты ансамбль «Беслæн» æрæджы уыдис горæт-хъæбатыр Волгограды, уыдон архайдтой Уæлахизы боны кадæн мадзæлтты. Æвæццæгæн, балц нæ рауадаид, республикæйы Парламенты депутаттæ, «Уæрæсейы патриотты» фракцийы уæнгтæ районмæ куы нæ ‘рцыдаиккой, уæд. Культурæйы хæдзары уыдис репетици æмæ уырдæм æрбацыди ФАДЗАЙТЫ Арсен, аныхас кодта ансамблы разамонæг ДУДИАТЫ Олегимæ. Загъта, хорз уаид, Волгограды бæрæгбоны концерты куы бацархаиккат, уæд. Æппæт хæрдзтæ Арсен райста йæхимæ, зæрдæ бавæрдта æвзонг кафджытæн, æппынæдзух сæм йæ хъус кæй дардзæн, уымæй.
Сывæллæттæ Волгограды стыр концерты акафыдысты «Симд» æмæ «Хохаг» кæфтытæ. Дудиаты Олег куыд зæгъы, афтæмæй ахæм фæлмæн зæрдæйыахаст æрæджыты никуыуал банкъардтой. «Тынг хорз цæстæй нæм ракастысты, архайдтам кадджын фембæлды, уыдысты дзы Паддзахадон Думæйы депутат Иринæ Гусева, волгоградаг диаспорæты минæвæрттæ, Хæлардзинады хæдзары сæрдар Фæрниаты Хъазыбег, хистæрты советы разамонæг Дауыраты Арсен. Ацы балцæй ницы рауадаид, Фадзайы-фырт йæхимæ æппæт хæрдзтæ куы нæ райстаид, уæд», — загъта ансамблы разамонæг. Волгограды цы егъау мемориалон комплекс ис, уый сывæллæтты зæрдæтæ фæцагайдта, бантыст сын æппæт дунейæн зындгонд Сталинграды историон бынæттæ, не ‘фсæдтæ сæ туджы фæстаг æртахы онг цы уынгтæ æмæ хæдзæрттæ хъахъхъæдтой, уыдон фенын.
Политикон парти «Уæрæсейы патриотты» регионалон хайады пресс-службæ
