Цæгат Ирыстон-Аланийы Хицауады Сæрдар ТУСКЪАТЫ Таймураз дыууæ боны дæргъы архайдта Хъазаны дунеон экономикон саммиты. Уыцы рæстæг Тускъаты Таймураз фембæлд Тæтæры Республикæйы Хицауады кабинеты уæнгтимæ, æрныхас кодтой дыууæ регионы ‘хсæн æмгуыстады фарстатыл экономикæйы къабазы. Ахæм фембæлдтытæ йын уыдис Тæтæры Республикæйы Хицауады Сæрдар Алексей ПЕСОШИНИМÆ, ахуырад æмæ наукæйы министр Рафис БУРГАНОВИМÆ, æнæниздзинад хъахъхъæнынады министр Марат САДЫКОВИМÆ, зæххы æмæ исбонадон ахадындзинады министр Азат ХАМАЕВИМÆ, культурæйы министр Ирада АЮПОВАИМÆ, финансты министр Радик ГАЙЗАТУЛЛИНИМÆ, экономикон æмæ социалон иртасæнты центры директор Алевтинæ КУДРЯВЦЕВАИМÆ. Æппæт уыцы хъуыддæгты архайдта нæ республикæйы экономикон рæзты министр ТОМАЙТЫ Хъазыбег дæр.
Дыууæ республикæйы минæвæрттæ бæстон æрныхас кодтой, субъектты социалон- экономикон рæзты хуыздæр цы хъуыддæгтæ æнтысы, уыдоныл. Хицæнæй фæбæрæг кодтой ахуырады, æнæниздзинад хъахъхъæнынады æмæ культурæйы фарстатæ дæр. Тускъаты Таймураз куыд бафиппайдта, афтæмæй Татарстан у нæ бæстæйы экономикон æгъдауæй размæцыддæр регионтæй иу. «Ацы ран хорз æнтысы инновацион куыстуæтты архайд, чысыл æмæ рæстæмбис бизнес у фидар, уæдæ промышленность æмæ куыстадон къабæзтæ дæр сты размæцыд. Регион æрæмбырд кодта стыр фæлтæрддзинад æмæ мах хъуамæ уымæй спайда кæнæм. Нæ æххæстгæнæг хицаудзинады оргæнты специалисттæ хъуамæ уыцы фæлтæрддзинадмæ сæ хъус æрдарой. Ныридæгæн уал фыццаг бадзырдтæ скодтам», — бафиппайдта Хицауады Сæрдар.
Республикæйы делегаци бацархайдта дунеон экономикон саммит «Уæрæсе — Пысылмон дуне»-йы фæлгæты конд æппæт хъуыддæгты дæр. Фæстаг бон дзы ныхас цыдис экспортæн паддзахадон æххуыс кæныныл æмæ инвестицитæ æрбаздахыныл. Рохуаты нæ баззадысты туризм æмæ ахуырады къабазы размæцыддæр технологитæй пайда кæныны нысантæ. Уымæй дарддæр Тускъаты Таймураз æмæ Томайты Хъазыбег бабæрæг кодтой Тæтæры Республикæйы размæцыддæр инновацион куыстуат — компани «Эйдос»-ы къорд. Уыдон сты инновацион центр «Сколково»-йы иу хай, архайынц Камскы территориалон-куыстадон инновацион центры. Компаниты къорд кусынц промышленнон автоматизацийы ахсджиагдæр фарстатæ алыг кæныныл æмæ уадзынц медицинон роботтæ.
«Медицинон лæггæдты æмæ специалисттæ бацæттæ кæныны хæрзхъæддзинад фæбæрзонддæр кæныны фарста у, инновацион размæцыддæр ногдзинæдтæ чи домы, ахæм хъуыддаг. Мах æркæсдзыстæм нæ медицинон кусæндæттæм ахæм технологитæ бахæссыны æмæ сын персонал бацæттæ кæныны гæнæнтæм», — фæнысан кодта нæ республикæйы Хицауады Сæрдар. Саммиты куысты дыккаг бон ма Томайты Хъазыбег фембæлд Татарстаны Инвестицион рæзты агентады разамонæгимæ. Уый агъоммæ та нæ республикæйы минæвæрттæ бабæрæг кодтой, амалхъомады фæндагыл нырма ныр чи ‘рлæууыд, уыдоны проектты равдыст, бацархайдтой саммиты пленарон æмбырды. Ахсджиагыл банымайгæ уыдис, агропромышленнон комплексы æмæ цæрæнуæтты-коммуналон хæдзарады къабæзты паддзахадон-хицæн адæймæгты æмархайды гæнæнтæй спайда кæныны тыххæй, цæлхæмбырд дæр.
Зындгонд куыд у, афтæмæй Уæрæсейы дунеон саммит æмæ Пысылмон диныл хæст паддзахæдты æмархайды организацийы æмбырд конд цæуы фарæстæм аз. Алы аз дæр дзы бацархайынц мингай специалисттæ. Ацы саммит йæхи равдыста хорзæрдыгæй, æппынæдзух дзы каст цæуы экономикон æмархайды æмæ иумæйаг проекттæ царды саразыны алыхуызон фарстатæм дæр. Ацы хатт дæр та саммиты бацархайдта Тæтæры Республикæйы Президент Рустам Минниханов, Пысылмон диныл хæст паддзахæдты æмархайды организацийы генералон секретарь Юсеф Усаймин. Саммит саразынæн кæддæриддæр баххуыс кæны нæ бæстæйы Федерацийы Совет æмæ Тæтæры Республикæйы Хицауад. Пысылмон диныл хæст паддзахæдты организаци конд æрцыд 1969 азы, ныртæккæ дзы ис 57 бæстæйы, сæ цæрджыты нымæц — 1,5 миллиард адæймаджы.
РЦИ-Аланийы Сæргълæууæджы æмæ РЦИ-Аланийы Хицауады пресс- службæ
