Знон РЦИ-Аланийы промышленность æмæ транспорты министр Хайдарбек БУТОВ бабæрæг кодта Дзæуджыхъæуы сывæллæтты æфсæнвæндаджы станцæ. Базонгæ йæ куыстимæ. Федта, йæ дæргъ дыууæ километры кæмæн у, уыцы æфсæнвæндаджы, вагæтты æмæ тепловозты уавæр.
Станцæйы хицау Наталья Лозовая уазæгæн куыд радзырдта, афтæмæй, ныртæккæ станцæйы ис æртæ ног вагоны æмæ тепловозы. Уыдоны фæрцы æфсæнвæндаджы куысты сусæгдзинæдтимæ зонгæ кæнынц Дзæуджыхъæуы æмæ республикæйы скъоладзау фæлтæрты. Уыдонæй радмæ гæсгæ чи поезд скъæрæг вæййы, чи — фæндарастгæнæг, фæндагмæкæсæг, машинист, чи та — картæтæ арæзæг, чи дзы станцæйы радиобастдзинады тыххæй дзуапп фæдæтты. Ныридæгæн ардæм сæ ныййарджытимæ цы сабитæ æрбацæуынц, уыдонæн лæггад кæнынц станцæйы кусджытæ куысты æппæт домæнтæ хынцгæйæ. Станцæйы æфсæнвæндаджы куысты сусæгдзинæдтыл ныртæккæ ахуыр кæны 700 чызг æмæ лæппуйы. Уыдонæн сæ ахуыры æмгъуыд куы фæвæййы, уæд дзы бирæтæ равзарынц машинисты, кæнæ æфсæнвæндагимæ баст æндæр дæсныйæдтæ. Станцæйы кусы алыхуызон техникон сфæлдыстадон къордтæ. Æмæ дзы сæ хъомылгæнинæгтæ цы алыхуызон поездты, тепловозты халдихтæ саразынц, уыдонимæ фæархайынц, куыд Цæгат Кавказы, афтæ Уæрæсейы алыхуызон æркастыты æмæ конкурсты. Æмæ дзы кæддæриддæр бацахсынц раззаг бынæттæ. Фæсивæдæн дзы арæзт æрцыд æппæт фадæттæ дæр, цæмæй, æфсæнвæндаджы куысты цы сусæгдзинæдтæ ис, уыдон базоной. Кълæстæ ифтонггонд сты нырыккон ахуырадон, методикон æмæ цæстуынгæ æрмæджытæй, картæтæй, компьютертæй.
Дзæуджыхъæуы сывæллæтты æфсæнвæндаг байгом 1966 азы. Хæссы нæ бæстæйы фыццаг сылгоймаг-космонавт, Советон Цæдисы Хъæбатыр Валентинæ Терешковайы ном. Ис Цæгат Кавказы æфсæнвæндаджы сконды. РЦИ-Аланийы промышленность æмæ транспорты министр фембæлды кæрон станцæйы бирæ уазджытимæ æмæ хæларзæрдæ фысымтимæ абалц кодта йæ аив æмæ рæсугъд фæндагыл.
ГАСАНТЫ Валерии
Къамтæ систа КЪÆБЫСТЫ Харитон
