Республикæйы æмæ Дзæуджыхъæуы Бон кадджынæй сбæрæг кодтой Ирыстоны цæрджытæ. Бæрæгбоны сæйраг мадзæлттæ уыдысты Хетæгкаты Къостайы номыл культурæ æмæ фæлладуадзæн парчы, Сабырдзинады проспекты æмæ Терчы былгæрон ногарæзт фæзы.
Бæрæгбоны мадзæлтты архайдтой РЦИ-Аланийы Сæргълæууæг Битарты Вячеслав, РЦИ-Аланийы Хицауады Сæрдар Тускъаты Таймураз, РЦИ-Аланийы Парламенты Сæрдар Алексей Мачнев, УФ-йы Президенты цур РЦИ-Аланийы Æххæстбарджын минæвар Дзанайты Барис, УФ-йы Паддзахадон Думæйы депутат Таймазты Артур, РЦИ-Аланийы мидхъуыддæгты министр Михаил Скоков, Дзæуджыхъæуы бынæттон хиуынаффæйады администрацийы сæргълæууæг Æлбегаты Барис.
Дзæуджыхъæуы бæстастæу уыд, 300 скъоладзауы кæм архайдтой, ахæм хиирхæфсæн программæ. Фæсивæд Ирыстоны æмæ Уæрæсейы тырысатимæ кафгæ æмæ заргæ æрзылдысты Сабырдзинады проспектыл. Ахæм мадзал фыццаг хатт уыд республикæйы æппæт районты дæр. Боны дæргъы Дзæуджыхъæуы фæзты æмæ паркты уыд национ хæринæгты, æрмдæсныты куыстыты тематикон равдыстытæ, армукъатæ. Горæты сæйраг уынджы цы цатыртæ æвæрд æрцыд, уым фенæн уыд рагон къамты, машинæты, æфсæддон техникæйы равдыстытæ.
Бæрæгбоны мадзæлтты РЦИАланийы Хицауады уæнгтæй чи архайдта, уыдон бабæрæг кодтой национ культурæты аллейæ, сахуыстой Цæгат Ирыстоны цæрæг адæмыхæттыты национ хæринæгтæй. Алы тематикон фæз дæр фæлгонцгонд уыд, бæлвырд адæмыхатты культурæйыл, цардыуагыл, æгъдæуттыл, æрмдæсныйады аивадмæ гæсгæ. Фенæн ма дзы уыд музейты æвæрæнтæй ист экспонаттæ дæр. Республикæйы районты хъæууонхæдзарадон товаруадзджытæ цы продукци уадзынц, уыцы равдыст дæр æхсызгонæй федтой. Уымæй уæлдай ма сын фадат уыд фермертимæ, амалхъомтимæ аныхас кæнынæн æмæ продукцийæ саходынæн дæр. — Нæ республикæ куы равзæрд, уæдæй абонмæ дзы хæларæй цæрынц бирæ адæмыхæттытæ. Нæ тых ис адæмты иудзинады, — загъта Битарты Вячеслав. Куыд ма банысан кодта, афтæмæй, ахæм равдыстыты фæрцы республикæйы цæрджытæн ис фадат хи товаруадзджыты продукциимæ фæлхасгæнджыты базонгæ кæнынæн дæр.
Бæрæгбоны фæлгæты уыд ныр фæндзæм хатт ирон уæливыхты фестиваль дæр. Чи йæм саккаг кодта, уыдонæн арæзт æрцыд æппæт гæнæнтæ дæр, цæмæй сæхæдæг скæной æртæ уæливыхы, саходой ирон хæринæгтæй, балхæной Ирыстоны уагъд тахынæджы æмæ æхсыры продукттæ. Республикæйы Сæргълæууæг æрзылд æппæт тематикон фæзтыл, арфæ ракодта бæрæгбоны æппæт архайджытæн.
— Æртæ уæливыхы фынгыл Ирыстоны цæрджытæн хуымæтæджы нысантæ не сты. Уыдонæй, бæгæныйы кæхц æмæ физонæгæй мах ссарæм Хуыцауы, зæдтæ æмæ дауджыты нæмттæ. Нæ фынг сæ цух куыд нæ уа, Хуыцау нын уыцы арфæ ракæнæд, — загъта Битарты Вячеслав. Бæрæгбоны кæронбæттæн мадзæлттæй иу уыд Дзæуджыхъæуы Сæрибары фæзы стыр концерт. Чи йæм æрбамбырд, уыцы адæмæн зæрдиаг арфæ ракодта РЦИ-Аланийы Сæргълæууæг Битарты Вячеслав.
— Дзæуджыхъæу у Хæстон намысы горæт, ацы бæрæгбоны фæрцы ма мах ноджыдæр иу хатт бузныг зæгъæм нæ хистæртæн, се сгуыхтдзинæдтæ сын дарæм нæ зæрдыл. Уæлахизхæссæг фæлтæрæй не ‘хсæн чи нал ис, уыдоны рухс нæмттæ арын, æмæ сын сæ фæдзæхстытæ æххæст кæнын та у нæ хæс. Ирыстоны фидæн æнцой кæны нæ фæсивæдыл. Æмæ нын сæ спортивон, ахуырадон, зонадон æмæ æндæр сгуыхтдзинæдтæй сæрыстыр цæмæй уæм, уыцы фадат куы раттынц, уæд ма уымæй хуыздæр цы уа. Мах та сын сæ хорздзинæдтæн кæддæриддæр æххуысгæнæг уыдзыстæм, — загъта Битарты Вячеслав.
Республикæйы Сæргълæууæджы ис ныфс, Ирыстон йæ рæзты раст фæндагыл кæй лæууы, уымæй. Уый зæрдæ бавæрдта, курдиатджын, æвзыгъд фæсивæдæн кæддæриддæр æххуыс кæй кæндзæн, уымæй.
— Кусын, фæллой кæнын кæй фæнды, уыцы лæппутæ æмæ чызджытæн нæ республикæйы уыдзæн æппæт уавæртæ æмæ гæнæнтæ дæр. Нæ зæрдæ дарæм, сæ архайдæн, сæ куыстхъомдзинадæн хорз фæстиуджытæ кæй уыдзæн, — загъта республикæйы Сæргълæууæг. Бæрæгбоны концерты кæронбæттæны уыд хуызджын фейерверк.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
