Махачкалайы уыд Цæгат Кавказы федералон зылды зарæггæнджыты къордты фестиваль. Цæгат Ирыстонæй дзы архайдтой цыппар аивадон-вокалон коллективы. Аивæдты республикон лицейы зарæггæнджыты къорд «Арион», Национ зарæджы нæлгоймæгты къорд (сæ разамонæг — РЦИ-Аланийы адæмон артисткæ Дзанайты Ольгæ), Цæгат Кавказы хæххон-металургон институты хор æмæ Цæгат Ирыстоны педагогон институты зарæггæнджыты къорд «Æлутон». Фестивалы архайæг профессионалон коллективты ‘хсæн фыццаг бынат бацахста Национ зарæджы нæлгоймæгты къорд. Хæдахуыр зарæггæнджыты къордты æхсæн та дыккаг бынæттæ бацахстой Цæгат Кавказы хæххон-металургон институты æмæ Цæгат Ирыстоны педагогон институты зарæггæнджыты къордтæ.
— Жюрийы уæнгтæ стыр аргъ скодтой, Ирыстоны аивадон-вокалон коллективтæй фестивалы чи архайдта, уыцы зарæггæнджыты курдиатæн, æмæ хорзыл банымадтой, национ культурæмæ аккаг æвæрæн кæй хæссынц, уый,— загъта нæлгоймæгты зарæггæнджыты къорды аивадон разамонæг, РЦИ-Аланийы адæмон артисткæ Дзанайты Ольгæ.
Зарæггæнджыты къордты Æппæтуæрæсеон фестивальмæ æвзарæн къæпхæны архайдтой дыууадæс коллективы Дагестанæй, Мæхъæлæй, Хъæрæсе-Черкесты республикæйæ, Цæцæнæй, Стъараполы крайæ, КæсæгБалхъарæй, Цæгат Ирыстонæй.
Зæрæггæнджыты къордты Æппæтуæрæсеон фестиваль уыдзæн Мæскуыйы ацы аз ноябры райдайæны.
