РЦИ-Аланийы Сæргълæууæг БИТАРТЫ Вячеслав фембæлд Ирыстонæй рацæуæг, голливудаг каскадер УЫРТАТЫ Эльбрусимæ. Зындгонд актер Битарты Вячеславæн радзырдта, йæ зæрды Ирыстоны егъау каскадерты центр саразын кæй ис, уый тыххæй. Йæ хъуыдымæ гæсгæ, уыцы центры цæттæ кæниккой фæсивæды, уыдонæн сæ бон уаид дунеон киноисæн фæзты ахсджиагæй архайын.
«Ацы хъуыды мæм раджы фæзындис, фæнды мæ, цæмæй мæ уарзон Ирыстоны фæстæмæ йæхиуыл схæца бæхтыл бадыны, алыхуызон хъæзтытæ сыл æвдисыны традици. Махæн, ирон адæмæн, уыдæттæ æцæгæлон не сты, нæ уидæгтимæ баст сты, уæдæ Хъантемыраты æмæ Тугъанаты мыггæгты минæвæрттæ сæхи дунейы мидæг базонын кодтой куыд дæсны барджытæ, артисттæ. Уыдон æнтыстджынæй сæхи æвдыстой циркты æмæ театрты, сæ хъомылгæнинæгтæ сæхæдæг систы дæсны барджытæ æмæ ныртæккæ кусынц дунейы зындгонд циркты æмæ киноисæн фæзты. Фæлæ фæстаг азты Цæгат Ирыстоны бæхтæдарыны, бæхтыл бадыны, джигитовкæмæ арæхсыны æууæлтæ бамынæг сты. Афтæмæй та ирæттæм уыцы хъуыддагмæ уыдис стыр тырнындзинад, ирон лæджы цард кæддæриддæр баст уыдис бæхимæ. Ирон лæг рагæй дæр уыдис дæсны барæгджигит, афтæ зæгъæн ис, æмæ джигитовкæ уыдис нæ туджы. Мæ хъуыдымæ гæсгæ, фæстæмæ уымæ хъæуы раздæхын», — загъта Уыртайы-фырт.
Каскадеры хъуыдымæ гæсгæ, Ирыстоны центр куы фæзынид, уæд дзы фæсивæды æрмæст каскадерты аивадыл нæ ахуыр кæниккой, фæлæ ма республикæйы цæрджытæ æмæ йæ уазджытæн суаид культурон хиирхæфсæн бынат замманай гæнæнтимæ. Уыртаты Эльбрус куыд загъта, афтæмæй ныртæккæ дунеон киноиндустрийы дæсны барджытæ агуырд цæуынц, уыцы хъуыддагæн ис хорз фидæн, ирыстойнаг фæсивæдæн та уый уаид сæхи равдисыны, се ‘нæниздзинад, сæ физикон уавæр фæхъæддыхдæр кæныны фадат. Уыртайы-фырты ныхæстæм гæсгæ, уый цæттæ у центры куыстмæ зындгонд специалистты æргом раздахынмæ, æндæр хъæугæ фæрæзтæй баххуыс кæнынмæ. Рæвдз у центр саразыны бизнеспълан дæр.
Битарты Вячеслав лæмбынæг байхъуыста æппæт уыцы ахсджиаг хъуыдытæм, зæрдæ бавæрдта Уыртаты Эльбрусæн, йæхирдыгæй хъуыддаг саразынæн алцæмæй дæр кæй баххуыс кæндзæн, уымæй. «Тынг зæрдæмæдзæугæ хъæппæрис у, æмæ, цæмæй царды фæзына, уымæн цыдæриддæр хъæуы, уый æнæмæнг скæндзыстæм. Сæйрагдæр у центрæн зæххы хай радих кæнын æмæ арæзтадмæ йæ бацæттæ кæнын, ома, хъæугæ инфраструктурæйæ йæ сифтонг кæнын. Уыдæттæ республикон хицаудзинадæн йæ бон у йæхимæ райсын», — фæнысан кодта республикæйы Сæргълæууæг.
Уымæй дарддæр, фембæлды рæстæг республикæйы разамонæг арфæ ракодта Уыртаты Эльбрусæн, Цæгат Ирыстоны кадыл дард бæстæты дæр кæй æфтауы, уый тыххæй. Уыртайы-фырт у Хъантемыраты Мухтарбеджы бæхты театры хъомылгæнинаг, ныр бирæ азты дæргъы цæры Хуссар Африкаг Республикæйы. Ис æм хи каскадерты студи, зындгонд у, голливудаг кинонывты кæй фæархайы, уымæй. Фæлæ йæ райгуырæн Ирыстон Уыртайы-фыртæй рох никуы вæййы, куыддæр ын куыстæй фадат фæвæййы, афтæ сæмбæлы фыдыуæзæгыл.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
