Цардæй ахицæн Цæгат Ирыстоны уæлдæр ахуырады системæйы фæлтæрдджындæр минæвæрттæй иу, зындгонд ахуыргонд, профессор Къомайты Риммæ Зауырбеджы чызг.
Къомайты Р.З. райгуырд 1930 азы горæт Беслæны. Дзæуджыхъæуы 28-æм скъола каст куы фæци, уæд йæ ахуыр адарддæр кодта Цæгат Ирыстоны паддзахадон педагогон институты филологон факультеты. Институт каст фæци 1962 азы.
Къомайты Риммæйы иумæйаг фæллойадон стаж у 60 азæй фылдæр, уыдонæй уый 50 азы снывонд кодта педагогон куыстæн. Йæ куыст иудадзыгдæр баст уыд Цæгат Ирыстоны Хетæгкаты Къостайы номыл паддзахадон университетимæ.
Къомайты Р.З. университеты кусын райдыдта 1963 азы – уæд сси педагогикæ æмæ психологийы кафедрæйы ассистент. 1965 азы йæ ахуыр адарддæр кодта Ленинграды паддзахадон университеты уырыссаг æвзаджы кафедрæйы цур аспирантурæйы. Аспирантурæ каст фæци 1967 азы – бахъахъхъæдта дзы кандидатон диссертаци. Уыцы аз кусын райдыдта Цæгат Ирыстоны паддзахадон университеты уырыссаг æвзаджы кафедрæйы. Къомайты Риммæйы дæсныдзинад уæлдай ирддæрæй рабæрæг, филологон факультеты деканы хæдивæгæй, факультеты деканæй, стæй та ирон филологи æмæ журналистикæйы факультеты деканæй куы куыста, уæд.
Фæстаг цалдæр азы дæргъы Къомайты Р.З. разамынд лæвæрдта ЦИПУ-йы ныхасы культурæ æмæ дзыллон коммуникациты æвзаджы кафедрæйæн, уыд 50 наукон куысты автор, уыдоны нымæцы – 5 монографийы. Йæ наукон куыстытæй стыр æвæрæн бахаста ирон æвзаг зонынадмæ, филологон наукæйы рæзтмæ.
Къомайты Р.З. стыр æргом здæхта национ скъолатæн наукон-методикон пособитæ цæттæ кæныны хъуыддагмæ. Йæ хъæппæрисæй уагъд æрцыдысты «Школьный фразеологический словарь», «Школьный орфоэпический словарь», «Школьный словарь иностранных слов» æмæ «Словарь трудностей русского литературного произношения».
Наукон-педагогон æмæ æхсæнадон куысты сгуыхтдзинæдты тыххæй Къомайты Риммæйæн лæвæрд æрцыд кадджын ном «РЦИ-Аланийы наукæ æмæ техникæйы сгуыхт кусæг», уыд «Уæрæсейы Федерацийы уæлдæр скъолайы сгуыхт кусæг», «Уæрæсейы Федерацийы уæлдæр ахуырады кадджын кусæг». 1994 азы йын лæвæрд æрцыд Хетæгкаты Къостайы номыл паддзахадон преми, 2012 азы та – майдан «Ирыстоны Намысæн». Хорзæхджынгонд æрцыд майдантæ «За освоение целины» æмæ «За доблестный труд».
Ахуыргонд, наукæйы æнувыд адæймаг, дæсны ахуыргæнæг Къомайты Риммæ Зауырбеджы чызджы ном æнустæм цæрдзæн йæ бирæ æмкусджытæ æмæ хъомылгæнинæгты зæрдæты, баззайдзæн Ирыстоны уæлдæр ахуырад æмæ фæллойадон азфысты историйы.
Битарты В.З., Мачнев А.В., Тускъаты Т.Р.
