Цæгат Ирыстоны æххæст кодтой мæйон «Æдас зымæгон фæндаг». Йæ сæйраг хæс уыд фæндаггон-транспортон фыдбылызты нымæц фæкъаддæр кæнын æмæ фæндагыл цыды æдасдзинады къæпхæн фæбæрзонддæр кæнын.
Мæйоны фæткмæ гæсгæ æппæт районты автоинспектортæ адæмимæ кодтой æмбарынгæнæн куыст, арæзт æрцыдысты профилактикон акцитæ. Зæгъæм, инвалид сывæллæтты реабилитацийы республикон центр «Феникс» бабæрæг кæнгæйæ, автоинспекцийы пропагандæйы хайады кусджытæ бынæттон сывæллæттæн æмбарын кодтой фæндагыл цæуыны фæтк.
Кировы районы мидхъуыддæгты хайады автоинспектортæ фæндæгты сæрты бацæуæнты сарæзтой фæндагыл цæуыны фæтк амонæн акци. Барадхъахъхъæнджытæ уæлдай фылдæр æргом аздæхтой фистæгæй цæуæг æнахъомтæм.
Æрыдоны районы автоинспектортæ Митын Дада æмæ Митæимæ иумæ Фыййаджыбылы рæвдауæндоны сарæзтой профилактикон акци «Светящийся пешеход». Уæлæдарæс æмæ æндæр дзаумæттыл хуыд рухс фæстæмæдæттæг хæйттæй пайда кæнын куыд æмбæлы, пъæлицæйы кусджытæ сывæллæттæн уый æмбарын кодтой. Уымæй уæлдай, профилактикон акци «Мы — за трезвых на дорогах» саразæг районы автоинспектортæ æмæ Цæгат Кавказы аграрон-технологион колледжы студенттæ хæдтулгæскъæрджытæн, фæндагыл цæуыны фæткы амынддзинæдтимæ гæххæттытæ сын байуаргæйæ, бафæдзæхстой нозтджынæй хæдтулгæ ма скъæрын.
Фæндаджы сæрты цæуын æмæ æдасдзинады ронæй пайда кæнын куыд æмбæлы, уæлæмхасæн урокты заман пъæлицæйы кусджытæ уыдæттæ амыдтой Дзæуджыхъæуы физикон-математикон лицейы цыппæрæм кълæсты ахуырдзаутæн.
Сывæллæтты уромæнгæрзтæй пайда кæнын æмæ фæндагыл æдасæй цæуын куыд æмбæлы, уыдæттæ фыст кæм сты, дзыллон профилактикон мадзал «Ребенок — главный пассажир» саразгæйæ, Æрæфы районы автоинспектортæ ныййарджытæн ахæм информацион буклеттæ радтой.
Уымæй уæлдай, пъæлицæйы кусджытæ сывæллæтты ласæг автобусты скъæрджытимæ кодтой æмбарынгæнæн ныхас.
Мæйоны фæткмæ гæсгæ профилактикон акцитæ ацыдысты республикæйы æппæт районты. Фæндагыл цæуыны фæтк æнæмæнг æххæстгæнинаг кæй у, амынд акцитæ саразæг барадхъахъхъæнджытæ адæмы зæрдыл уый ноджыдæр ма иу хатт æрлæууын кодтой. РЦИ-Аланийы Мидхъуыддæгты министрады фæндæгтыл æдасæй цæуыны паддзахадон инспекции
