Знон Национ наукон библиотекæйы уыд конкурс «Общественное признание»-йы лауреатты кадгæнæн изæр. Ацы аз фыццаг хатт ахæм преми сфидар кодта РЦИ-Аланийы Æхсæнадон палатæ. Хорзæхджын дзы кæндзæн æхсæнадон, культурон, хæрзаудæн организациты минæвæртты, æхсæнады алы фарстатæ дзыллон хабархæссæг фæрæзты æргомæй чи хæссы адæмы размæ, уыцы журналистты. Премийы нысан у граждайнаг æхсæнады ахадындзинад адæмы зонды æмæ царды фæахадгæдæр кæнын.
Кадджын изæры архайдтой РЦИ-Аланийы Хицауады Сæрдар Тускъаты Таймураз, РЦИ-Аланийы Æхсæнадон палатæйы сæрдар Нинæ Чиплакова, уазджытæ Цæгат Кавказы иннæ республикæтæй.
Мадзалы архайджытæн зæрдиаг арфæ ракодта Тускъаты Таймураз. — Граждайнаг æхсæнад саразын у не ‘ппæты хæс дæр. Уымæн æмæ нæ риссаг фарстатæ нæхæдæг куы нæ лыг кæнæм, нæ бæстæйы, Ирыстоны иудзинадыл, фæрныгадыл иумæйаг хъарутæй куы нæ архайæм, уæд нæ фидæнмæ фæндаг æбæрæг уыдзæн. Ацы æппæт нысантæ нæ бæстæйы цæрджыты размæ æвæры Уæрæсейы Президент Владимир Путин дæр. Ирыстоны æхсæнады минæвæрттæ граждайнаг хъуыды нæ дзыллæйы æхсæн кæй фидар кæнынц, уымæн æвдисæн, ацы преми арæзт кæй æрцыд, уый дæр, — загъта Хицауады Сæрдар.
Преми дæттыны размæ æвдыст æрцыд цыбыр видеороликтæ æхсæнадон, фæсивæдон, сфæлдыстадон организациты куысты тыххæй.
Конкурс «Общественное признание»-йы жюрийы уæнгтæ цыппар номинацийы премитæ саккаг кодтой республикон æхсæнадон хæрзаудæн фонд «Быть добру»-йы сæргълæууæг Хъуысаты Амырханæн, уæзхъус адæмæн æххуысгæнæг фонд «Мы мир звуков»-ы разамындæн, амалхъом Гуыриаты Владимирæн, УФ-йы Паддзахадон Думæйы депутат Таймазты Артурæн, амалхъом Сильвæ Акопянæн.
Журналистты æхсæн преми «Общественное признание»-йы лауреаттæ систы паддзахадон унитарон куыстуат «Иринформ»-ы сæргълæууæг Таболты Иринæ, газет «Рæстдзинад»-ы сæйраг редакторы хæдивæг Бутаты Эльзæ, æмæ ПТРК “Алани”-йы проекттæ «Фыдæлты уæзæгмæ» æмæ «Возвращение к истоку»-йы автор Туаты Алинæ. Преми «Общественное признание»-йы Арфæйы фыстæджытæ ма радтой æхсæнадон организациты иугæндты журналистты къордтæн æмæ газет «Рæстдзинад»-ы хистæр уацхæссæг Гасанты Валерийæн.
АНВАРАТЫ В. Къамтæ систа ЦÆГÆРАТЫ Дауыт
