Цæгат Ирыстоны Хетæгкаты Къостайы номыл паддзахадон университеты знон йæ куыст райдыдта регионалон наукон-практикон конференци «Колмогоровские чтения». Уый цæудзæн къуырийы дæргъы. Йæ саразын баст у, алы аз дæр 8 февралы кæй бæрæг кæнынц, Уæрæсейы наукæйы уыцы бонимæ.
Цæгат Ирыстоны конференци фыццаг хатт арæзт æрцыд 15 азы размæ, 2003 азы, ссæдзæм æнусы зындгонд математик, академик Андрей Колмогоровы райгуырдыл 100 азы куы сæххæст, уæд. «Колмогоровские чтения» у Скъоладзауты дунеон наукон конференцийы регионалон къæпхæн. Йæ саразджытæ сты Уæрæсейы наукæты академийы Дзæуджыхъæуы наукон центр, уымæн йæ филиал — Хуссайраг математикон институт, Цæгат Ирыстоны паддзахадон университет, Ахуырады кусджыты зонындзинæдтæ фылдæргæнæн институт æмæ Математикон ахуырады дзæуджыхъæуккаг центр. Йæ саразынæн алкæддæр цæстуарзон æххуыс бакæны нæ республикæйы Ахуырад æмæ наукæйы министрад.
Конференцийы сæйраг нысан у, наукæ æмæ сфæлдыстадон курдиаты цæхæр кæмæ ис, ахæм скъоладзаутæ агурын æмæ сын æххуыс кæнын; физикон-математикон æмæ æрдзон-наукон ахуырады системæ рæзын кæнын; æхсæнады, ахуырдзау фæсивæды ‘хсæн наукæйы кад бæрзонд сисын; скъолаты ахуыргæнджыты иртасæн куыстмæ разæнгард кæнын æмæ сын сæ наукон-методикон зонындзинæдтæ фылдæр кæнын.
Ацы хатт конференцийы кадджын уазæг уыд Мæскуыйы Ломоносовы номыл паддзахадон университеты цур сæрмагонд ахуырадоннаукон центр «Колмогоровы скъола»-йы директор, физикон-математикон наукæты кандидат, доцент Владимир Дубровский.
Конференцийы архайджытæн æмæ уазджытæн арфæйы ныхæстæ загътой республикæйы ахуырад æмæ наукæйы министры хæдивæг Алыккаты Алан, Цæгат Ирыстоны паддзахадон университеты ректор Огъуаты Алан æмæ Дзæуджыхъæуы наукон центры разамонæг Къусраты Анатоли.
Скъоладзаутæ фæсаууонмæ цы 50 куысты бацæттæ кодтой, уыдонæй конференцийы æркæсынмæ æвзæрст æрцыд æрмæстдæр 32. Уыдонæй 12 куысты сты математикæйæ, 4 — физикæ æмæ химийæ, 6 — биологийæ æмæ 8 — информатикæйæ.
Конференци арæзт у дыууæ къæпхæнæй. Фыццаг къæпхæны жюрийы уæнгтæн стендыл æвдыст æрцæудзысты конференцийы архайджыты докладтæ, арæзт æрцæудзæн ахуырдзауты проектон-иртасæн куыстыты конкурс, дыккаг къæпхæны та ацæудзысты скъоладзауты олимпиадæтæ математикæйæ, физикæйæ, информатикæйæ, биологи æмæ химийæ.
Дзæуджыхъæуы наукон центры ахуырадон секратерь, педагогон наукæты кандидат Верæ Абаптурова куыд загъта, афтæмæй конференци уæлдай ахсджиагдæр уымæн у, æмæ скъолаты ахуыргæнджытæн йæ фæлгæты кæй ис сæ фæлтæрддзинадимæ кæрæдзи базонгæ кæныны, сæхи зонындзинæдтæ фылдæр кæныны, наукон-иртасæн куыстмæ се ‘ргом ноджы тынгдæр здахыны æмæ уыцы нысанимæ курдиатджын скъоладзаутæ цæттæ кæныны фадат.
Конференци йæ куыст кæндзæн къуырийы дæргъы, 4-11 февралы.
З.АГЕЕВА
