Гом акционерон æхснад «Электроцинчы» дарддæры хъысмæты тыххæй республикæйы Хицауады цур цы къамис арæзт æрцыд, уый йæ цæст дары, Цæгат Ирыстон æмæ Уралы хæххон-металлургон компанийы ‘хсæн фидаргонд бадзырдтæ куыд æххæстгонд цæуынц, уымæ, стæй заводы промышленнон алфамбылæйтты ныры санитарон-гигиенон уавæрмæ
Ацы фарстатæ куыд æххæстгонд цæуынц, уый сбæрæг кæныны нысанимæ завод ацы бонты радон, æртыккаг хатт бабæрæг кодтой республикæйы Хицауады Сæрдары хæдивæг Фадзайты Æхсарбег, паддзахадон исбоны æмæ зæххыты ахастыты министр Тедеты Руслан æмæ промышленност æмæ транспорты министры хæдивæг Мадзаты Эльбрус.
«Электроцинчы» разамындимæ æмгуыстады сæйраг нысан у, раздæр цæуыл баныхас кодтой, уыцы фарстатæ æмбæлгæ фæткмæ гæсгæ æххæст кæнын. Республикæйы Хицауады минæвæрттæ сæхи цæстæй федтой, 21 октябры зынгсирвæзты фæстæ товарон продукци уадзыны хъуыддаг бынтондæр урæд кæй у, уый. Заводы дыууæ цехы — вельццех (кусы туаггуыр æмæ цинчы, кадмийы, здыйы, клинкеры иугондты хомагыл) æмæ гидрометаллургион цех ныртæккæ æвдæлон кæнынц, куыстад кæронмæ кæй нал ахæццæ, уымæ гæсгæ цы продукцийы хомаг баззад, уый, цæмæй техникæ æмæ ифтонггæрзтæ ма фехæлой, фæлæ æхгæд æмæ хъахъхъæд æрцæуой.
Заводы директор Игорь Ходыко къамисы уæнгтæн радзырдта «Электроцинчы» ныры уавæры тыххæй, кæй ракалынц, куысты уыцы æрмæджыты гуырахсты æмæ, куыстытæ кæронмæ кæд ахæццæ уыдзысты, уыцы æмгъуыдты тыххæй. Уымæй уæлдай, 25 февралы социалон хызæгты цы видео æвæрд æрцыд, уыимæ баст фарстытæн радта дзуапп. Къамы зыны, заводы цехтæй иу куыд судзы, уый. Зынгсирвæзт дзы уыд, зæгъгæ, кæмæй загътой, уыцы бынат федтой Фадзайты Æхсарбег, Тедеты Руслан æмæ Мадзаты Эльбрус. Игорь Ходыко куыд бамбарын кодта, афтæмæй уыцы ран уазал кæнынц вельццехы пецты подшипниктæ, æмæ уымæ гæсгæ рацæуы фæздæг.
— Мах баныхас кодтам, цæмæй хицауадон къамисы уæнгтæ алы къуыри дæр бæрæг кæной завод æмæ уавæрмæ цæст дарой. Нæ хæс у адæммæ хæццæ кæнын, заводæн йæ куыст бауромыны хъуыддаг куыд æххæстгонд цæуы, уый тыххæй æппæт хъусынгæнинаг, — загъта Фадзайты Æхсарбег.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
