Цæгат Ирыстоны паддзахадон регистрацийы, картографи æмæ кадастры федералон службæйы Цæгат Ирыстоны управлени у Цæгат-Кавказы федералон зылды хуыздæр ведомствæтæй иу. Уыцы хабар фехъусын кодта Росреестры Цæгат Кавказы федералон зылды управленийы разамонæг Николай ЧЕРНУХИН республикæйы Сæргълæууæг БИТАРТЫ Вячеславимæ йæ фембæлды рæстæг.
— Фæстаг азты ацы кусæндон рейтингты ахсы раззаг бынæттæ. Фарон РЦИ-Аланийы Росреестры управлени рахызт æнæзмæлгæ исбоны Иумæйаг паддзахадон реестры Федералон паддзахадон информацион системæйы промышленнон эксплуатацимæ. Ног хуызы куысты фæткмæ хизгæйæ, къуылымпытæ нæ уыд, стæй хъуыддаг æххæстгонд æрцыд æмбæлгæ æмгъуыдтæм. Уый дзурæг у кадастры палатæйы, бирæкъабазджын центртæ æмæ субъекты хицаудзинады æххæстгæнæг оргæнты нывыл æмгуыстадыл, — загъта Николай Чернухин æмæ арфæ ракодта республикæйы Сæргълæууæгæн, хъуыддагæн кæй æххуыс кодта, уый фæдыл.
Битарты Вячеслав куыд бафиппайдта, афтæмæй фæстаг азты Росреестры æмæ хицаудзинады æххæстгæнæг оргæнты ‘хсæн ис фидар бастдзинад, сæйрагдæр та, Цæгат Ирыстонæн уыцы бастдзинад кæй у пайдахæссæг.
— Адæмæн царды нывыл уавæртæ цæмæй уа, уым бирæ аразгæ у Росреестры архайдæй, æмæ республикон управлени стыр бæрнонæй бацыд бизнес аразыны процедурæтæ фæхуымæтæгдæр кæныны æмæ инвестицитæ Республикæ Цæгат Ирыстон-Аланимæ здахыны программæ æххæст кæнынмæ. Республикæйы размæцыдæн уый у стыр ахъаз, æмæ уыцы куыст дарддæр æххæст кæндзыстæм, — загъта Битарты Вячеслав.
Уымæй уæлдай, фембæлды ныхас цыд паддзахадон лæггæдты хæрзхъæддзинадыл æмæ хыгъды-регистрацион процедурæты хъуыддаг нывылдæр кæныныл.
Республикон ведомствæйæн йæ къухы æнтыстытæ кæй æфты, стæй йæ хæстæ аккаг æмæ бæрнонæй кæй æххæст кæны, уый тыххæй Николай Чернухин Битарты Вячеславæн радта риуылдаргæ нысан.
Фембæлды ма архайдта æнæзмæлгæ исбоны объектты кадастры федералон агентады цæгатирыстойнаг управленийы разамонæг Токаты Хъазыбег.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
