Республикæйы хъæуы социалон æххуысы иумæйаг программæ, цæмæй уый, фыццаджыдæр, хæццæ кæна, æцæгæйдæр, паддзахадон æххуысхъуаг цы граждæнтæ сты, уыдонмæ. Ахæм документ саразынæн спайда кæнын хъæуы уæрæсейаг иннæ регионты нырыккондæр фæлтæрддзинадæй. Программæ хъуамæ уа электронон хуызы. Ацы фарстайыл цыд ныхас Проектон офисы æмбырды. Сæрдариуæг дзы кодта республикæйы Сæргълæууæг БИТАРТЫ Вячеслав.
— Социалон æххуыс бакæнынимæ баст уавæр хъæуы лæмбынæг сахуыр æмæ сбæлвырд кæнын, æххуыс цы социалон бæрæггæнæнтæм гæсгæ арæзт хъуамæ цæуа, уыдон. Зæгъæм, сбæлвырд кæнын хъæуы, куыстдæттыны къабазы адæмæн æгуыстдзинады тыххæй цы æхца дæттынц, уыдоны уавæр. Ис ахæм цаутæ, æмæ æгуыст адæймаг уыцы æхцайæ уæлдай исы æххуыс социалон хъахъхъæнынады кусæндæттæй дæр. Æмæ йæ уæд куыст дæр цæмæн хъæуы, кæд æмæ йын ацы фæрæзтæй ис цæрæн? Иннæ фарст — адæмæй бирæтæ, куыстыл хæст кæй сты, уый официалон æгъдауæй фидаргонд нæ вæййы. Уый аххосæй республикон бюджетыл æрынцайы Æнæмæнг медицинон фæдзæхстады фондмæ бафыстытимæ баст уæлдай уаргъ, — загъта Битарты Вячеслав æмæ бæлвырд хæстæ радта вицепремьер Иринæ Азимовайæн æмæ фæллой æмæ социалон рæзты министр Хуыбиаты Барисæн.
Битарты Вячеслав æмбырды архайджыты æргом аздæхта фæллой хъахъхъæныны мадзæлттæм дæр. Йæ ныхасмæ гæсгæ, нырма ацы къабазы бирæ ис аразинаг хъуыддæгтæ. Кусæг æмæ куыстуаты разамынды ‘хсæн ахастдзинæдтæ æрмæст коллективон бадзырдæй хицæн кæной, уымæн æруадзæн нæй.
— Куысты уавæртæ нывыл не сты, æмæ уым аххосджын сты куыстуæтты разамонджытæ, райдай директорæй æмæ фæу цехы хицауæй кæнæ мастерæй. Адæм кусынц уазал бæстыхæйтты, бирæ хатт сыл кусæджы сæрмагонд дарæс дæр нæ вæййы, афтæмæй. Адæймаг зæронд, скъуыдтæ дарæсы куса, уымæн куыд ис æруадзæн ныры рæстæг? Профилон министрадмæ хъуамæ уа уавæр сраст кæныны гæнæнтæ, — загъта Битарты Вячеслав.
Республикæйы Сæргълæууæг бафæдзæхста Хуыбиаты Барисæн, цæмæй министрад бацæттæ кæна документ, æмæ уымæ гæсгæ конкурс саразыны бындурыл бæрæггонд цæуой, фæллойы уавæртæ æппæтæй хуыздæр кæм сты, ахæм куыстуæттæ.
РЦИ-Аланийы Сæргълæууæджы æмæ РЦИ-Аланийы Хицауады пресс-службæ
