Ивгъуыд майрæмбоны республикон Фæсивæдон галуаны уыд, Цæгат Ирыстоны астæуккаг скъолаты драмон къордты фестивал «Амраны рухс»-ы концерт. Архайдтой дзы ацы сфæлдыстадон конкурсы районты раззаг бынæттæ чи бацахста, æмæ республикон фестивалæн йæ кæронбæттæн хайы, фестивалы жюрийы уæнгтæ хуыздæрыл кæй аивад æмæ курдиат банымадтой, уыцы фæсивæд. Уыдон та æвдыстой ирон фысджыты литературон уацмыстæм гæсгæ скъуыддзæгтæ, кастысты æмдзæвгæтæ.
Гала-концерты райдайæны уазджытæн, фестивал саразджытæн, уæлахиздзаутæн арфæ ракодта РЦИ-Аланийы Хицауады Сæрдар Тускъаты Таймураз.
— Ацы фестивал ирдæй равдыста Ирыстоны курдиатджын, размæцыд, сфæлдыстадон хъомысæй хайджын чи у, ахæм фæсивæд кæй ис, уый. Ацы конкурсы фæрцы бирæ кæстæртæн байгом уыдзæн сæ фæндаг ирон театралон аивады дунемæ. Мæ зæрдæ дарын ууыл, æмæ абон ацы сценæйы сæ курдиат чи æвдисы, уыцы кæстæртæ сæ уды рухсæй кæй батавдзысты нæ бæстæйы театрдзауты зæрдæтæ дæр. Стыр бузныг зæгъын хихъæппæрисадон къордты разамонджытæн. Уыдон сæ архайдæй дарддæр хæццæ кæныныц ирон театралон аивады æгъдæуттæ, — загъта Тускъаты Таймураз.
Уый фæстæ, фестивалы кæронбæттæн хаймæ цы фæсивæд æвзæрст æрцыд, уыдон ноджыдæр ма иу хатт равдыстой сæ курдиат æмæ арæхстдзинад. Аргъ сын кодтой жюрийы уæнгтæ: РЦИ-Аланийы аивæдты сгуыхт архайæг, Хетæгкаты Къостайы номыл паддзахадон премийы лауреат, режиссер Бекъойты Розæ, РЦИ-Аланийы сгуыхт артист, фæсивæдон театр «Амран»-ы директор Сидахъаты Дзамболат, Цæгат Ирыстоны адæмон артисттæ Цырыхаты Розæ, Дзгойты Аллæ, Хадаты Альберт, УФ-йы сгуыхт артисткæ Хъабанты Тамарæ, РЦИ-Аланийы аивæдты сгуыхт архайæг, режиссер, Цæгæраты Руслан. Уыдоны хатдзæгтæм гæсгæ ацы аз фестивалы фыццаг бынат бацахста Æрыдоны район, Æрæфы район рацыд дыккаг бынатмæ, Рахизфарсы районы архайджытæм та æрхаудта æртыккаг бынат. Уыдонæн æмæ, фестивалы номинацитæм гæсгæ чи фæуæлахиз, уыцы æвзонг артисттæн саккаг кодтой РЦИ-Аланийы Фæсивæды хъуыддæгты комитеты дипломтæ, Кады гæххæттытæ, Арфæйы фыстæджытæ æмæ зæрдылдарæн лæвæрттæ.
ГАСАНТЫ Валерии
