Ацы бонты Чувашийы республикӕйы сӕйраг горӕт Чебоксарыйы йӕ куыст кӕны куклаты театрты фыццаг дунеон фестивал «Аргъӕутты зилдух». Уыцы сфӕлдыстадон ӕркасты архайӕг у цӕгатирыстойнаг театр «Саби» дӕр.
Фестивалы сӕйраг темӕ у дунейы адӕмты аргъӕуттӕ ӕмӕ таурӕгътӕ. Ирыстойнаг артисттӕ дзы равдисдзысты абхазаг аргъӕуттӕм гӕсгӕ ӕвӕрд спектакл «Хуры чызг». Спектаклы режиссер-ӕвӕрӕг у Багъраты Иринӕ, сфӕлгонц ӕй кодта нывгӕнӕг Иринӕ Кулкина. Архайынц дзы актертӕ Гуыдиаты Марат, Берозты Алинӕ, Рубайты Илонӕ ӕмӕ Гӕбӕраты Габрэил.
Фестивалы жюрийы куыд фехъусын кодтой, афтӕмӕй сфӕлдыстадон ерысы архайынц 15 уӕрӕсейаг регионы театртӕ — Башкирийӕ, Мордовийӕ, Удмуртийӕ, Владимиры, Воронежы, Мӕскуыйы облӕсттӕй ӕмӕ афтӕ дарддӕр. Уыдонӕй уӕлдай, фестивалы сӕ арӕхстдзинад ӕвдисынц Белоруссийы, Казахстаны, Китайы, Германы, Япон ӕмӕ Кубӕйы сфӕлдыстадон коллективтӕ дӕр.
Нӕ уацхӕссӕг
