Гуырдзыстоны хицауады загъдкъахӕн архайд фӕстаг рӕстӕг дыууӕ регионы ахастдзинӕдтӕ кӕй фӕкарздӕр кодта, уыцы ӕууӕл хынцгӕйӕ, Хуссар Ирыстон рӕстӕгмӕ ӕрӕхгӕдта, Гуырдзыстонимӕ паддзахадон арӕныл цы контролон-уадзӕн пункттӕ кусы, уыдон.
Уый тыххӕй знон фехъусын кодта информацион агентад «Рес».
Информацион агентады минӕварӕн республикӕйы Паддзахадон ӕдасдзинады комитеты куыд фехъусын кодтой, афтӕмӕй «Хуссар Ирыстоны цӕрджыты ӕдасдзинадӕн-уӕлӕмхасӕн мадзӕлттӕ аразыны нысанимӕ рӕстӕгмӕ урӕд ӕрцыд хуссарирыстойнаг-гуырдзыстойнаг паддзахадон арӕныл ӕрбынӕттонуӕвӕг уадзӕн пункттӕ «Раздӕхӕн» ӕмӕ «Синагур»-ы куыст».
Уыимӕ, Паддзахадон ӕдасдзинады комитеты хъусынгӕнинагмӕ гӕсгӕ, паддзахадон арӕнмӕ ‘ввахс уавӕр хуыздӕрӕрдӕм куы фӕива, уӕд уадзӕн пункттӕ ногӕй байгом кӕндзысты.
