Зындгонд куыд у, афтӕмӕй 21 сентябры бӕрӕггонд цӕудзӕн Республикӕ Цӕгат Ирыстон-Аланийы бон.
Уыцы бӕрӕгбоны кадӕн бирӕ алыхуызон бӕстӕзонӕн ӕмӕ хиирхӕфсӕн мадзӕлттӕ уыдзӕн Дзӕуджыхъӕуы ӕмӕ республикӕйы районты.
Бӕрӕгбоны фӕлгӕты ныр ӕхсӕзӕм хатт арӕзт ӕрцӕудзӕн ирон чъириты фестивал дӕр. Куыд иннӕ хӕттыты, афтӕ ныр дӕр фестивалы архайджытӕ ӕмӕ уазджытӕ ӕрбамбырд уыдзысты Къесайы-фырты уынджы Терчы былгӕрон фӕлладуадзӕн бынатмӕ. Уыимӕ, ацы аз фестивал суыдзӕн ӕппӕтуӕрӕсеон.
Дзӕуджыхъӕуы администрацийы ӕххуысӕй ирон чъириты фестивал бацӕттӕ кӕныныл кусы базарадон-экономикон техникумы директор ӕбиты Валери.
Уыцы бон арӕзт ӕрцӕудзӕн ирон цыхты фестивал дӕр. Ирыстойнаг ӕфсинтӕй алкӕмӕн дӕр фадат ис сӕ арӕхстдзинад равдисынӕн.
Ӕмӕ ма иу хъуыддаг. Зындгонд куыд у, афтӕмӕй ацы бонты республикӕйы цӕуынц фестивал «Ирон бӕгӕны»-йы районы ӕмвӕзады къӕпхӕнтӕ дӕр. 21 сентябры арӕзт ӕрцӕудзӕн Дзӕуджыхъӕуы муниципалон къӕпхӕн дӕр.
