Республикӕ Цӕгат Ирыстон-Аланийы Национ ахастдзинӕдты фарстыты фӕдыл министрад, Цӕгат Ирыстоны Хетӕгкаты Къостайы номыл паддзахадон университет ӕмӕ Цӕгат Ирыстоны зӕххыл цӕрӕг сомихаг адӕмы национ-культурон ӕхсӕнад «Эребуни»-йы хъӕппӕрисӕй знон Дзӕуджыхъӕуы байгом дунеон наукон-практикон конференци «Алантӕ ӕмӕ Сомихы ӕмахастытӕ. Сӕ рагистори ӕмӕ ныры дуг».
Конференци уыд Аланийы аргъуыды 1100 азы кадӕн юбилейон мадзӕлтты фӕлгӕты. Архайдтой дзы историктӕ ӕмӕ политологтӕ, культурӕйы архайджытӕ Сомихы республикӕйӕ, Кавказы Институты сӕргълӕууӕг Александр Искандарян, Сомихы республикӕйы ӕххӕстбарджын минӕвар УФ-йы Хуссайраг Федералон зылды (Ростовы) Вардан Асоян, РЦИ-Аланийы национ ахастдзинӕдты фарстыты фӕдыл министр Цуциты Аслан, Фыд Леонид, национ-культурон ӕхсӕнадты минӕвӕрттӕ, уазджытӕ Цӕгат Кавказы Федералон зылдӕй, Дзӕуджыхъӕуы Сомихаг аргъуаны сауджын ӕмӕ ӕндӕртӕ.
Ӕрныхас кодтой дыууӕ адӕмыхатты ӕхсӕн историон бастдзинӕдтыл, нӕ дарддӕры ахастдзинӕдты рӕзтыл, царды пайдайаг программӕтыл ӕмӕ, нӕ ахастдзинӕдтӕ фидардӕр куыд кӕной, ууыл.
Пятигорскы сервис, туризм ӕмӕ дизайны институты ЦКФУ-йы наукон куыстыты сӕргълӕууӕджы хӕдивӕг, политикон наукӕты доктор, профессор Арушан Вартумян радзырдта УФ-йы ӕмӕ Сомихы республикӕйы ӕхсӕн ахастдзинӕдты тыххӕй.
— Рагон историон сыфтӕ куы рафӕлдахӕм, уӕд бӕлвырдӕй фенӕн ис, Уӕрӕсе Сомихы паддзахады историйы алкӕддӕр зынгӕ бынат кӕй ахста, уый. Ӕнгом бастдзинӕдтӕ уыдис не ‘хсӕн куыд историон, афтӕ политикон, социалон-экономикон, дины фарстыты, культурон ӕмӕ афтӕ дарддӕр. Фӕлӕ ныртӕккӕйы цард чысыл аивта. Кавказы политикон картӕйыл фӕзындысты ног сӕрибар паддзахӕдтӕ: Гуырдзыстон, Азербайджан ӕмӕ Сомихы республикӕ. Сомихы республикӕйӕн Уӕрӕсейы Федерациимӕ нӕй иумӕйаг арӕнтӕ, уымӕ гӕсгӕ УФ ӕмӕ Гуырдзыстоны ахастдзинӕдтӕ куы февзӕр вӕййынц, уӕд Сомихы республикӕ дӕр бахауы «экономикон уацары», уымӕн ӕмӕ Арвыкомы фӕндаг уыдонӕн у — «царды фӕндаг», — загъта Арушан Вартумян.
Конференцийы сӕ хъуыдытӕ загътой, докладтӕ скодтой РЦИ-Аланийы Истори ӕмӕ археологийы институты хистӕр наукон кусӕг Мамиаты Михал, филологон наукӕты кандидат Тадевос Тадевосян, филологон наукӕты кандидат, ирон ӕвзаджы кафедрӕйы доцент Санаты Ритӕ, историон наукӕты кандидат, Цӕцӕны республикӕйы Наукӕты академийы гуманитарон иртасӕнты институты директор Супьян Магамадов, Хуссар Ирыстоны Уанеты Захары номыл наукон-иртасӕнты институты директор, историон наукӕты кандидат Гаглойты Роберт ӕмӕ иннӕтӕ.
Конференцийы архайджытӕ скодтой чиныджы ӕмӕ документалон кинонывы презентаци зындгонд уӕрӕсейаг хӕстон командӕгӕнӕг ӕмӕ паддзахадон архайӕг Лорис-Меликовы тыххӕй. Лорис-Меликовӕн йӕ равзӕрд у сомихаг.
Конференци цӕуы дыууӕ боны. Абон йӕ архайджытӕ балцы ацӕудзысты Куырттаты коммӕ. Уазджытӕ базонгӕ уыдзысты Куырттаты комы ирон адӕмы историон цыртдзӕвӕнтимӕ.
Хъойбайты Галинӕ
