Знон Республикӕ Цӕгат Ирыстон-Аланийы сӕйраг горӕт Дзӕуджыхъӕуы Уӕрӕсейы Федерацийы энергетикӕйы министр Александр Новак цы уӕрӕхгонд ӕмбырд сарӕзта, уый байгом кодта РЦИ-Аланийы Сӕргълӕууӕг Битарты Вячеслав ӕмӕ зӕрдӕбын арфӕтӕ ракодта Александр Новак ӕмӕ компани «Россети»-йы генералон директор Павел Ливинскийӕн.
Федералон энергетикон къабазы разамонӕг хорзыл банымадта компани «Россети» ӕмӕ Республикӕ Цӕгат Ирыстон-Алани, Уӕрӕсейы Федерацийы Хицауады уынаффӕтӕ ӕххӕстгӕнгӕйӕ, цы бирӕ иумӕйаг мадзӕлттӕ аразынц, уыдон.
Александр Новак куыд фӕнысан кодта, афтӕмӕй алы архайд дӕр хъуамӕ арӕзт уа регионы цӕрджыты царды уавӕртӕ хуыздӕр кӕнынимӕ, ӕмӕ уыцы хъуыддаджы хорз бӕрӕггӕнӕнтӕ ӕвдисы бизнес ӕмӕ хицаудзинады иумӕйаг архайд ацы республикӕйы. Уӕрӕсейы Хицауад тынг ахсджиагыл нымайы, энергетикон инфраструктурӕйы хорз финансон уавӕр кӕй у ӕнӕмӕнг хъуыддаг алы регионы социалон-экономикон рӕзтӕн. «Абон Цӕгат Ирыстоны, — дзырдта дарддӕр министр, — уавӕр уыцы хъуыддаджы цӕуы хуыздӕргӕнгӕ, фӕлӕ ма дзы кусинаг хъуыддӕгтӕ чысыл нӕй. Уымӕ гӕсгӕ регион ӕмӕ «Россети»-йы къорды иумӕйаг куыст кӕнын хъӕуы дарддӕр дӕр».
Ӕмбырды ныхас цыд Цӕгат Ирыстоны электрон тыхдӕттӕны реконструкци кӕныныл ӕмӕ инвестицион программӕты рӕзтыл.
— «Россети»-йы къорд алы регионы дӕр кусы фӕлхасгӕнджыты пайдайӕн. 2030 азмӕ цы нысантӕ ӕвӕрӕм ӕмӕ ныртӕккӕ кусын кӕуыл райдыдтам, уыцы ногдзинӕдтӕ Республикӕ Цӕгат Ирыстон-Аланийы цӕрджытӕ ӕмӕ амалхъомады архайджытӕ дӕр хӕстӕгдӕр рӕстӕджы банкъардзысты электронтыхдӕттыны хӕрзхъӕддзинад, — загъта ӕмбырды Павел Ливинский.
Республикӕйы Сӕргълӕууӕг Битарты Вячеслав федералон министр ӕмӕ электрон тыхты холдинджы минӕвӕрттӕн зӕрдӕ бавӕрдта иудадзыг алыхуызон ӕххуысӕй Цӕгат Ирыстоны Хицауады ‘рдыгӕй.
— Республикӕ зӕрдиагӕй архайы интеллектуалон электрон тыхты комплексы рӕзтыл. Арӕзт ӕрцыдысты республикӕйы хӕрзхъӕд электрон тыхӕй ӕфсадыны проекттӕ. Рӕзынц республикӕйы хъуыддаджы ахастдзинӕдтӕ энергетикӕйы министрад ӕмӕ «Россети»-йы дӕлхайӕдтимӕ. Уыцы архайд та ӕнтыстджынӕй арӕзт у бирӕ азтӕм, — загъта Битарты Вячеслав.
Ӕмбырды райдайӕны йӕ архайджытӕ базонгӕ сты, ныртӕккӕ Цӕгат Кавказы федералон зылды «Россети»-йы къорд цы ахсджиаг социалон объекттӕ аразы, уыдоны экспозицитимӕ.
Хицауады хӕдзары фоэйы уазджытӕ базонгӕ сты Мӕздӕгӕй Ручъы тъунелы цӕгатфарсы онг Цӕгат Ирыстоны электрон тыхты ног ахсджиаг цыппар проектимӕ.
Касаты Батрадз
