Арвӕрдынау алыхуызон у цард. Ис ахӕм адӕм, иудадзыг йӕ хъысмӕты зӕд йӕ мидбылты кӕмӕ фӕхуды. Фӕлӕ, алы аххосӕгтӕм гӕсгӕ, йӕ цӕфтӕн чи нӕ ныффӕразы, уыцы адӕммӕ ӕххуысы къух кӕм бадарынц, ныфс дзы кӕм бауадзынц, ахӕм артдзӕстытӕй иу у нӕ республикӕйы хӕдзар-интернат «Узӕлд». Ацӕргӕ адӕймаджы боны размӕ, мах бӕбӕрӕг кодтам ацы интернат. Ам йӕ зӕрдӕйӕн ӕмӕ удӕн ӕнцойдзинад чи ссардта, уыцы адӕм чысыл не сты.
Дзгойты Махар, ам цӕры 2011 азӕй фӕстӕмӕ. Райгуырд Елхоты. Астӕуккаг скъола дӕр ам фӕци каст. Йӕ фӕллойадон фӕндаг фыццаг баст уыд районы алыхуызон куыстуӕттимӕ. Фӕлӕ ма Махарӕн Хуыцау балӕвар кодта кафӕджы курдиат дӕр. Йӕ рӕстӕджы уыд паддзахадон академион ансамбл «Алан»-ы артист. Йӕхи хуызӕн, курдиатджын кафджытимӕ Махар, ирон аивады рӕсугъддзинадимӕ зонгӕ кодта нӕ бӕстӕйы, ӕмӕ суанг дунейы сӕдӕгай цӕрджыты. Фӕлӕ иуахӕмы бахауд фӕндаггон фыдбылызы. Дохтыртӕ йӕ цардмӕ раздӕхтой, фӕлӕ йӕ хореографион аивадӕн хӕрзбон зӕгъын бахъуыд.
Махар бирӕ азты дӕргъы, медицинон кусджыты амындмӕ гӕсгӕ, цард Астӕуккаг Азийы. Ирыстонмӕ куы сыздӕхт, уӕд цӕмӕй йӕм фӕкӕсӕг уа, уый тыххӕй, йӕхи бакодта ацы интернаты уазӕг. ӕмӕ дзы йӕхи дзӕбӕх ӕнкъары, цы кусджытӕ дзы ис, уыдон ӕм се ‘ппӕт дӕр куыд хорз цӕстӕй кӕсынц, уый тыххӕй нын зӕрдӕйы цинимӕ дзырдта. Махарыл кӕд азтӕ чысыл нӕ цӕуы, уӕддӕр йӕ фезмӕлд, ӕмӕ цӕстыты цӕхӕрӕй бӕрӕг у йӕ уды арфы цардмӕ разӕнгардзинады кӕй ис, уый. Интернаты ис ахӕм адӕм, йӕхицӕн дзы цардӕмбал, чи ссары, уыдон. Михаил Зайчик ӕмӕ Маринӕ Зелотова сӕ чындзӕхсӕв дӕр интернаты скодтой. Сӕ хъысмӕты сӕйрагдӕр цины цау баиу, бинонты, иузӕрдиондзинады ӕмӕ уарзты ӕппӕтуӕрӕсеон бонимӕ. Куыд нын радзырдтой, афтӕмӕй Михаил райгуырд Уӕрӕсейы горӕттӕй иуы. Ам бирӕ азты дӕргъы цӕры. Йӕхицӕн бинойнаг кӕмӕй загъта, уый Маринӕ та йӕ мадимӕ цард интернаты. Фӕлӕ цалдӕр азы размӕ йӕ ныййарӕг амард. Сылгоймаг, цӕмӕй йӕхимӕ хъусыныл ма фӕуыдаид, уый тыххӕй йын ӕххуыс кодтой интернаты ӕппӕт кусджытӕ дӕр. Маринӕйӕн йӕ рызт зӕрдӕмӕ, хуры тынау, рухсхӕссӕг басгуыхт, Михаил. Ӕмӕ ныр сӕ зӕрдӕйы, кӕм низы, кӕм та царды зын фӕлварӕнтӕй, цы хъӕдгӕмттӕ ис, уыдон сабыргай-сабыргай амонды бардуаджы фӕрцы, кӕрӕдзийы ӕмбарынады руаджы, дзӕбӕх кӕнддзысты.
Интернаты разамонӕг Хъӕцмӕзты Фатимӕ нын куыд радзырдта, афтӕмӕй сӕм ныртӕккӕ цӕры 136 адӕймаджы. Сӕрмагонд реабилитацион программӕмӕ гӕсгӕ сын, интернаты медицинон ӕмӕ социалон кусджытӕ кӕнынц алывӕрсыг, нырыккон домӕнтӕн дзуапп чи дӕтты, ахӕм ӕххуыс. Аз дыууӕ хатты сын алы низтӕ дзӕбӕхгӕнӕг дохтыртӕ сбӕрӕг кӕнынц се ‘нӕниздинад. Интернат ӕнгом, бадзырды уагыл, ӕмгуыст кӕны Дзӕуджыхъӕуы 1-ӕм поликлиникӕйы ӕмӕ ӕндӕр дзӕбӕхгӕнӕндӕтты медицинон кусджытимӕ. Йӕхи мидӕг ис алы фадӕттӕ дӕр йӕ цӕрджыты удӕнцойдзинадӕн. Кусы дзы массажгӕнӕн, физионтерапевтон, физикон культурӕйы, психологты ӕмӕ ӕндӕр кабинеттӕ.
Социалон фӕдзӕхстады фонды республикон хайад та, интернаты цӕрджытӕй цӕуынхъом чи нӕу, уыдонӕн радих кӕны реабилитацион фӕрӕзтӕ. Ӕрӕджы, нӕ бӕстӕйы социалон кусӕндӕттӕн ӕххуыс кӕныны программӕмӕ гӕсгӕ, федералон ӕмӕ республикӕйы бюджеты фӕрӕзтӕй, ӕххӕстӕй цалцӕгонд ӕрцыдысты интернаты ӕппӕт бӕстыхӕйттӕ дӕр. Арӕзтад цӕмӕй афоныл ахицӕн уа, ӕмӕ интернат ӕппӕт социалон, цардуагон, медицинон кусӕнгӕрзтӕй ифтонггонд ӕрцӕуа, уымӕ йӕ цӕст лӕмбынӕг дардтой нӕ республикӕйы Сӕргълӕууӕг Битарты Вячеслав, ӕмӕ Хицауады Сӕрдар Тускъаты Таймураз. Уый тыххӕй йӕ, нӕ цӕрджытӕ уӕлдай бузныг сты. Ныридӕгӕн та, кӕронмӕ фӕхӕццӕ кӕны интернаты хи тӕвдгӕнӕны цалцӕггӕнӕн куыст.
Хӕдзар-интернаты цӕрджытӕ, цӕмӕй сӕ уӕгъд рӕстӕг хъӕлдзӕгӕй ӕрвитой, уый тыххӕй дзы арӕх вӕййы хъазтизӕртӕ. Сӕрмагонд концерттимӕ сӕм уазӕгуаты вӕййынц нӕ республикӕйы зындгонд зарӕггӕнджытӕ ӕмӕ музыканттӕ. Сӕхӕдӕг дӕр арӕхсынц зарынмӕ, ӕмӕ алыхуызон сценикон сурӕттӕ аразынмӕ. Уымӕ гӕсгӕ дзы ныр бирӕ азты дӕргъы ӕнтыстджынӕй сфӕлдыстадон куыст кӕны зарӕггӕнджыты къорд «Заботушка». Ацы сфӕлдыстадон коллектив иу ӕмӕ дыууӕ хатты не сси республикон вокалон конкурсты уӕлахиздзау. Йӕ разамонӕг та у дӕсны музыкант Борис Беляев.
Ацы аз ма интернаты байгом инклюзивон театр-студи «Уӕлтӕмӕнад». Йӕ архайджытимӕ иттӕг разӕнгардӕй кусы Тӕбӕхсӕуты Балойы номыл ирон академион театры артисткӕ Пагӕты Фатимӕ.
Ӕрӕджы, хӕдзар-интернат «Узӕлд» суазӕг кодта нӕ бӕстӕйы социалон кусӕндӕтты сӕргълӕуджыты. Ам сын цы семинар арӕзт ӕрцыд, уымӕ гӕсгӕ йӕ архайджытӕн фадат фӕци, дӕнцӕджы хуызы, ацы кусӕндоны архайды ӕппӕт гӕнӕнтимӕ ӕмӕ уавӕртимӕ базонгӕ уӕвынӕн.
Фидарӕй зӕгъӕн ис, республикон хӕдзар-интернат «Узӕлд» кӕй у нӕ бӕстӕйы хуыздӕр социалон ӕххуысы артдзӕстытӕй иу. Царды уӕзӕй, фӕцудынӕй тӕссаг кӕмӕн у, уыцы адӕмӕн ам ныфсӕвӕрӕг кӕй разынынц, сӕ хъысмӕты рухс фидӕныл сӕ кӕй баууӕндын кӕнынц, уый у, интернаты алы кусӕгӕн дӕр йӕ уды ӕмӕ зӕрдӕйы рухсы ӕвидигӕдзинад ӕвдисӕг.
Анварты Валери
