Фӕззӕджы ралӕудимӕ зынгӕ фӕфылдӕр вӕййы грипп ӕмӕ ӕндӕр ахӕм вирусон низтӕй рынчын адӕмы нымӕц.
Уыцы ӕууӕл хынцгӕйӕ, куыд Уӕрӕсейы иннӕ регионты, афтӕ Цӕгат Ирыстоны дӕр санитарон цӕстдарды ведомствӕтӕ ӕмӕ медицинон кусӕндӕттӕ адӕмы ӕнӕниздзинад бахъахъхъӕныны нысанимӕ иудадзыгдӕр ӕххӕст кӕнынц профилактикӕйы алыхуызон мадзӕлттӕ. Уыдонӕй иу, кӕй зӕгъын ӕй хъӕуы, у адӕмы дзыллон вакцинаци.
Уыцы мадзалӕй уӕрӕх пайда кӕнынц нӕ республикӕйы дӕр. Федералон службӕ «Роспотребнадзор»-ы Цӕгат Ирыстоны республикон управленийы пресс-службӕ куыд фехъусын кодта, афтӕмӕй федералон бюджеты хардзӕй афойнадыл ӕлхӕд ӕрцыд гриппы ныхмӕ хос. Ныртӕккӕ республикӕйы гриппы ныхмӕ цы вакцинӕ ис, уый фӕрцы уколтӕ скӕнӕн ис республикӕйы цӕрджыты ӕмбисӕн. Абоны онг уал вакцинацийы мадзӕлттӕ аххӕссыдысты не ‘мзӕххонты 20 процентыл.
«Роспотребнадзор»-ы минӕвары ныхасмӕ гӕсгӕ, лӕвар вакцинаци кӕнынц адӕмы цалдӕр къордӕн: 18 азы кӕуыл нӕма сӕххӕст, уыцы сывӕллӕттӕ ӕмӕ ӕнахъомтӕн; медицинӕ ӕмӕ ахуырады кусджытӕн; цардыуаджы лӕггӕдты къабазы ӕмӕ паддзахадон разамынды специалисттӕн; маргъдарӕн ӕмӕ фосдарӕн хӕдзарӕдты фӕллойгӕнджытӕн, стӕй иннӕтӕн.
Адӕмӕн вакцинаци кӕнынц бынӕттон поликлиникӕты, кӕнӕ сӕрмагонд медицинон къордтӕ ацӕуынц организацитӕм.
Нӕ уацхӕссӕг
