Августы сывӕллӕтты «Кванториум-15» технопарчы сӕрдыгон проектон скъола «ЗОНД»-ы хуыздӕр уӕнгтӕ архайдтой Севастополы техникон ӕрхъуыдыдзинӕдтӕй дунеон чемпионаты.
Ерысты архайдтой проектон скъолатӕ кастфӕуӕг фӕсивӕд. Дзӕуджыхъӕуккаг Даниил Лесы ӕмӕ цхинвайлаг Гуыцмӕзты Андрейы командӕтӕ дзы райстой чемпионаты уӕлахиздзауты дипломтӕ.
Ӕппӕт Уӕрӕсейӕ скъоладзаутимӕ иумӕ цӕгатаг ӕмӕ хуссарирыстойнаг лӕппутӕ ӕмӕ чызджытӕ бакуыстой чемпионат саразӕг горӕт Севастополы рӕзтӕн ахъазгӕнӕг уынаффӕтыл. Ерысты архайджытӕ проекттыл бакуыстой тӕккӕ фылдӕр авд адӕймагӕй арӕзт командӕтӕй. Алы адӕймагӕн дӕр уыд хи рол: раздзог, программист, дизайнер ӕмӕ афтӕ дарддӕр. Командӕтӕ дихгонд уыдысты фондз къордыл: ӕнӕниздзинад хъахъхъӕнынад, ахуырад, горӕты экосистемӕ, ӕхсӕнадон горӕтаг тыгъдадтӕ ӕмӕ туризм.
Даниил Лесы командӕ бакуыста проект «Smart-скорая»-йыл (канд «тагъд медицинон ӕххуыс»-ы хӕдтулгӕты маршруттӕ нӕ, фӕлӕ низы ӕвдисӕнтӕм гӕсгӕ диагноз дӕр чи бацамоны, ныхас цӕуы ахӕм автоматизацигонд системӕйыл).
Гуыцмӕзты Андрей йӕ командӕимӕ бакуыста проект «Горӕты экосистемӕ»-йыл. Ӕнӕнхъӕлӕджы уавӕртӕ зӕронд хӕдзӕртты цӕмӕй ма сӕвзӕрой, уый тыххӕй проектыл кусӕг адӕм бахастой цӕстдарды системӕ «SmarSa»-йӕ пайда кӕныны фӕндон. Сыгъды ӕмӕ ӕрдзон газы бӕрц, стӕй бӕстыхайы акъулдзинады къӕпхӕн чи хынцдзӕн, уыцы ифтонггӕрзтӕ аиппыты тыххӕй хабӕрттӕ сӕрмагонд службӕтӕм автоматикон уагӕй ӕрвитдзысты.
Светланӕ Макаренко
