Ирон номдзыд поэт Хетӕгкаты Къостайы райгуырды 160 азы кадӕн куыд Цӕгаты, афтӕ Хуссары дӕр цӕуынц бӕрӕгбоны мадзӕлттӕ. Поэты юбилейон азы фӕдыл Хуссар Ирыстоны уыд Хетӕгкаты Къостайы номыл Паддзахадон премийы конкурс.
Ацы преми советон дуджы лӕвӕрд цыд литературӕйы, культурӕйы, аивады ӕмӕ зонады къабазы ӕвӕджиауы сгуыхтдзинӕдтӕ кӕмӕн уыд, уыдонӕн. Ивгъуыд ӕнусы 90-ӕм азты преми нал лӕвӕрдтой, Гуырдзыстоны национал-фашисттӕ гӕрзифтонгӕй Хуссар Ирыстонмӕ кӕй лӕбурдтой, уый тыххӕй. Фӕлӕ, Республикӕ Хуссар Ирыстон хӕдбар паддзахад куы ссис, уӕд та ацы преми 2009 азы дӕттыны фӕтк сног кодтой. Райдайӕны преми лӕвӕрд цыд дыууӕ азы иу хатт. Ныр та Президент Бибылты Анатолийы барамындмӕ гӕсгӕ, Къостайы преми лӕвӕрд цӕудзӕн поэтӕн йӕ юбилейон азты, ома, фондз азы иу хатт.
Президенты уагӕвӕрдмӕ гӕсгӕ преми лӕвӕрд цӕудзӕн фондз номинацийӕ — литературӕйы, аивады, публицистикӕйы, ирон филологи ӕмӕ историон наукӕйы къабӕзты. Ацы аз конкурсы алы номинацийы архайдтой цыппӕрдӕс адӕймаджы, уыдонӕн дыууӕ мӕйы дӕргъы уавӕртӕ ӕмӕ фадӕттӕ уыдис сӕ куыстытимӕ уӕрӕх дзыллӕты базонгӕ кӕнынӕн.
Преми кадджын уавӕры лӕвӕрд ӕрцыд ацы аз 16 октябры Хуссар Ирыстоны паддзахадон драмон театры агъуысты.
Литературон къабазы Хетӕгкаты Къостайы номыл премийы лауреат ссис зындгонд поэтессӕ, Уӕрӕсейы Фысджыты цӕдисы уӕнг Чехойты Ольгӕ. Преми саккаг кодтой ацы чингуыты тыххӕй: «Нӕ Иры зӕринхур, Къоста!», (Цхинвал, 2017), «Дӕуыл хаст дӕн, «Ирон фӕндыр!» (Цхинвал, 2017), «Ты мне дана, «Осетинская лира» (авторы тӕлмац) (Цхинвал, 2017), «Хетӕгкаты Къостайӕн» (йӕ райгуырды 160 азмӕ), (Цхинвал, 2019).
Чехойты Ольгӕ стыр бузныг загъта, йе сфӕлдыстадӕн ын ахӕм стыр аргъ кӕй скодтой, уый тыххӕй, зӕрдӕбын арфӕ ракодта Президент Бибылты Анатолийӕн, сфӕлдыстадон ӕмӕ аивадон кусджытыл зӕрдиагӕй кӕй ауды, ӕмӕ бахатыд Республикӕйы Президентмӕ, цӕмӕй йын, кӕй саккаг кодтой, уыцы премийы ӕхца — 350 мин сомы радта республикӕйы сидзӕрты ӕртӕ скъола-интернатӕн.
Хетӕгкаты Къостайы номыл Паддзахадон преми ма лӕвӕрд ӕрцыд Республикӕ Хуссар Ирыстоны сгуыхт артисткӕ, адӕмон инструментты паддзахадон оркестры аивадон разамонӕг Уалыты Нинӕйӕн. Преми райста ирон фӕндыры музыкалон композици «Хӕхтыл»-ы тыххӕй.
Публицистикӕйы къабазы преми саккаг кодтой зындгонд журналист, историон наукӕты кандидат Хъуылымбегты Робертӕн йӕ чингуытӕ «Южная Осетия. От прошлого по настоящему» (Цхинвал 2017), «Южная Осетия. Год за годом» (Цхинвал 2018) ӕмӕ журнал «Фидиуӕджы» редакцийӕн.
Наукӕйы къабазы преми райста филологон наукӕты кандидат, профессор Дзабиты Зарбег, преми йын саккаг кодтой йӕ чиныг «Ирон фразеологон дзырдуат»-ы тыххӕй.
Дыууӕ хайыл адих кодтой преми зындгонд историктӕ Дзугаты Къоста ӕмӕ Гаглойты Юри. Историон наукӕты кандидат, доцент Дзугаты Къостайӕн преми лӕвӕрд ӕрцыд йӕ монографи «Понятие «окна возможности» применительно к интеграционно-воссоединительному процессу Осетии (1917-1921, 1925, 1936 г.г.)» (Цхинвал 2017-2018).
Историон наукӕты кандидат, профессор Гаглойты Юри та преми райста йӕ наукон куыстыты ӕмбырдгонд «Нарты и Аланы» фӕдыл.
Кадджын мадзалы Хетӕгкаты Къостайы номыл лауреаттӕн, мадӕлон ӕвзаджы сӕрхъызойтӕн, стӕй наукӕйы, аивады ӕмӕ культурӕйы минӕвӕрттӕн зӕрдиаг арфӕ ракодта Республикӕ Хуссар Ирыстон-Аланийы Президент Бибылты Анатоли. Уый загъта:
— Къоста ирон адӕмӕн у сӕ сӕрибары ӕмӕ Фыдыбӕстӕмӕ уарзондзинады символ. Поэты ном сӕрыстырӕй зӕлланг кӕны алкӕй зӕрдӕйы ӕмӕ у фӕндагрухсгӕнӕг стъалы алы ирон адӕймагӕн дӕр. Уый йе сфӕлдыстады ирдӕй равдыста йе ‘мбӕстаг адӕмы мӕгуырдзинад, сӕ рис ӕмӕ фӕндиӕгтӕ. Президент фӕсидт иудзинадмӕ, фӕсидт, цӕмӕй нӕ адӕм ма рох кӕной, Къоста нын цы ныууагъта, уыцы монон ӕмӕ удварнон хӕзнатӕ. Уымӕн ӕмӕ Къоста у нӕ зондамонӕг, рухс цардмӕ нӕ разӕнгардгӕнӕг ӕмӕ нӕ хъомылгӕнӕг.
Ирон адӕмӕн, уыдонимӕ Къостайы номыл лауреаттӕн зӕрдӕбын арфӕ ракодта Абхазы Адӕмон поэт, Ирыстоны уарзон хӕлар, Абхазы делегацийы сӕргълӕууӕг Геннадий Аламия.
Кӕронбӕттӕны Хуссар Ирыстоны аивады ӕмӕ культурӕйы паддзахадон ансамблтӕ ӕмӕ хихъӕппӕрисадон къордтӕ сӕ аивадӕй барухс кодтой бӕрӕгбоны архайджыты зӕрдӕтӕ.
Томайты Рохсанӕ
