Республикӕйы Хицауады Сӕрдар ТУСКЪАТЫ Таймураз ӕмӕ экономикон рӕзты министр ТОМАЙТЫ Хъазыбег фембӕлдысты акционерон ӕхсӕнад «МСП-банчы» минӕвӕрттӕ Арсан ДЕМЕЛЬХАНОВ ӕмӕ Темур КАЗИЕВИМӔ. Ныхас цыд уыцы банчы филиал Цӕгат Ирыстоны байгом кӕныныл.
Уазджытӕ куыд загътой, афтӕмӕй банчы филиал байгом кӕныны хъуыддаг фӕахъаз уыдзӕн чысыл ӕмӕ рӕстӕмбис бизнесы архайджытӕн кредиттӕ дӕттынӕн. Уый тыххӕй банкӕн ис ӕфстӕуттӕ дӕттыны алыхуызон программӕтӕ. Уымӕй уӕлдай, ӕфстау ӕхцатӕ банк дӕтты зӕрдӕмӕдзӕугӕ проценттимӕ — афӕдзмӕ 8,5.
— Ис нӕм чысыл кредит райсынӕн хицӕн программӕ дӕр, уыцы программӕмӕ гӕсгӕ ахӕм ӕхцатӕн райсӕн уыдзӕн уӕлдай ӕнцондӕрӕй. Уымӕй уӕлдай, банк ӕххӕст кӕны финансон ӕххуысы ӕндӕр зӕрдӕдарӕнтӕ дӕр, — загъта банчы менеджер Темур Казиев.
Тускъаты Таймураз куыд бафиппайдта, афтӕмӕй банчы ахӕм зӕрдӕмӕдзӕугӕ гӕнӕнтӕм, ӕнӕмӕнг, се ‘ргом раздахдзысты бынӕттон амалхъомтӕ.
— Кредиттӕ дӕттыны хъуыддаджы ныры онг цы механизмтӕ уыд, уыдонӕй пайда кӕнгӕйӕ, ахсджиаг у хъӕууонхӕдзарадон продукци куыстгӕнӕг къабаз размӕ ракӕнын. Продукцийы гуырахст фӕфылдӕр кӕнынӕн ис бирӕ гӕнӕнтӕ, сӕ иу у куыстадон процесс фӕхъомысджындӕр кӕнын. Ӕппӕт уыдӕттӕ сты рӕстӕджы домӕн, — фембӕлды рӕстӕг загъта Хицауады Сӕрдар.
Цӕгат Ирыстон ӕмӕ «МСП-банчы» ‘хсӕн хъуыддаджы бастдзинӕдтӕ ныронг ӕрфидар сты. Ӕмӕ дарддӕр дӕр ноджы фидардӕр цӕмӕй кӕной, уый тыххӕй республикӕйы Экономикон рӕзты министрад бацӕттӕ кодта ахсджиаг проекттӕ.
Нӕ уацхӕссӕг
