Ацы азмӕ Дзӕуджыхъӕуы цы фӕндаггон куыстытӕ нысангонд ӕрцыдысты, уыдон кӕронмӕ фӕхӕццӕ кӕнынц. Куыстытӕ куыд цӕуынц, уый радон хатт сбӕрӕг кодтой горӕты администрацийы разамонджытӕ.
Зындгонд куыд у, афтӕмӕй ацы азы арӕзтад ӕмӕ цалцӕджы пълантӕм бахастой горӕты уынгты 28 участочы. Уымӕй уӕлдай, цалцӕггӕнӕн куыстытӕ цыдысты, административон ӕгъдауӕй Дзӕуджыхъӕуы дӕлбар цы поселоктӕ ис, уыдоны дӕр.
Горӕты администрацийы бӕрнон кусджытӕ куыд фехъусын кодтой, афтӕмӕй ног арӕзт ӕмӕ цалцӕггонд участоктӕй ныридӕгӕн 23 байгом кодтой, иннӕ бынӕтты дӕр куыстытӕ кӕронмӕ фӕхӕццӕ кӕнынц. Цалцӕггӕнӕн ӕмӕ арӕзтадон куыстыты иу хайӕн фӕрӕзтӕ дихгонд ӕрцыд сӕрмагонд федералон программӕ «ӕдас ӕмӕ хӕрзхъӕд фӕндӕгты» фӕлгӕты.
Дзӕуджыхъӕуы администрацийы сӕргълӕууӕг Фӕрниаты Тамерлан муниципалон кусӕндон «Фӕндаггон фонд»-ы разамонджытимӕ бабӕрӕг кодта Калинины, Мамсыры-фырты, Хъойбайы-фырты ӕмӕ иннӕ уынгтӕ. Подрядон организацийы минӕвӕрттӕ куыд радзырдтой, афтӕмӕй Хъойбайы-фырты уынджы нысангонд куыстытӕ иуцасдӕр фӕкъуылымпы сты. Уымӕн ӕмӕ, куыд рабӕрӕг, афтӕмӕй ӕвӕстиатӕй бахъуыд донуадзӕн хӕтӕлтӕ раивын дӕр. Уыимӕ, подрядчик донуадзӕн хӕтӕлтӕ ивыны куыстытӕ дӕр йӕхи хардзӕй бакодта. Уыцы уынджы цӕрджытӕ Фӕрниаты Тамерланӕн куыд радзырдтой, афтӕмӕй ныр разы уыдзысты ног фӕндаг ӕмӕ цӕрӕнуӕтты-коммуналон хӕдзарады системӕйы рацарӕзтӕй дӕр.
Горӕты администрацийы кусджытӕ бабӕрӕг кодтой, цалцӕггӕнӕн куыстытӕ кӕм цӕуы, ӕндӕр ахӕм бынӕттӕ дӕр.
«Куыстыты цыды графикӕй уӕлдай, бӕстон цӕстдард ис хӕрзхъӕддзинады фарстмӕ дӕр. Подрядон организацитимӕ цы бадзырдтӕ бафыстам, уыдоны бындурыл аразджытӕ ног арӕзт фӕндӕгты ӕнӕкъуыхцы куыстыл дзуапп дӕтдзысты 5-7 азы дӕргъы», — йӕ инспекцион балцӕн хатдзӕгтӕ кӕнгӕйӕ, бафиппайдта Фӕрниаты Тамерлан.
Дзӕуджыхъӕуы администрацийы пресс-службӕ
