Цӕгат Ирыстоны Райрӕзты агентады туризмы хайады сӕргълӕууӕг Мысыкаты Зӕирӕ йӕ амонӕг кӕмӕн уыд, ахӕм кусӕг цӕлхӕмбырд арӕзт ӕрцыд Дзӕуджыхъӕуы.
Цӕлхӕмбырды ныхас цыд, нӕ республикӕйы туризмы райрӕзтӕн туроператортӕй, туристон фирмӕтӕй ӕмӕ экскурсиамонджытӕй цас ӕмӕ цы аразгӕ у, уыдоныл.
Мысыкаты Зӕирӕ уый тыххӕй загъта: «Туризмы райрӕзт ныртӕккӕ нымад у нӕ республикӕйы ахъаззагдӕр къабӕзтӕй иуыл. Мах цы проекттыл кусӕм, уыдонмӕ лӕмбынӕгӕй йӕ хъус дары нӕ республикӕйы Сӕргълӕууӕг.
Нӕ куыст аразӕм афтӕ, цӕмӕй Ирыстоны туристон уавӕртӕ уой дунейы раззагдӕр туристон бӕстӕты ӕмвӕз. Кӕй зӕгъын ӕй хъӕуы, ахӕм уавӕртӕ цӕмӕй сырӕзой, уый тыххӕй нӕ фӕндагыл гыццыл нӕй цӕлхдуртӕ дӕр. Зӕгъӕм, ныртӕккӕ нӕм нӕй, нӕ алы кӕмтты, хъӕуты ӕмӕ горӕтты цы историон цыртдзӕвӕнтӕ ӕмӕ цымыдисаг бынӕттӕ ис, уыдоныл лӕмбынӕгӕй дзурӕг фыст ӕрмӕджытӕ. Ахӕм ӕрмӕджытӕ нӕ тынг хъӕуынц, туристтимӕ чи кусдзӕн, ахӕм экскурсиамонджытӕ (гидтӕ) цӕттӕ кӕнынӕн. Уымӕй уӕлдай ма ахӕм ӕрмӕджытӕй спайда кӕниккам туристон фӕндӕгты тыххӕй чысыл чингуытӕ (буклеттӕ) скӕнынӕн.
Уыцы фарстытӕ алыг кӕныны охыл мах ныртӕккӕ кусӕм Истори ӕмӕ археологийы институт ӕмӕ Цӕгат Ирыстоны гуманитарон ӕмӕ социалон иртасӕнты институты наукон кусджытимӕ.
Туризмы райрӕзты ахъаззаг бынат ахсынц, нӕ историон бынӕтты тыххӕй цы ӕмбисонды хабӕрттӕ ӕмӕ таурӕгътӕ уыдис, уыдон. Зӕгъӕм, ӕппӕт дунейыл дӕр айхъуыстысты Шотландийы цад Лох-Нессийы кӕнӕ Румынийы граф Дракулӕйы ӕмбисонды таурӕгътӕ. Ахӕм таурӕгътӕ стыр ахъаз сты туристты нымӕц фылдӕр кӕнынӕн. Хъыгагӕн, абон махмӕ, нӕ республикӕйы алы кӕмтты дӕр цы бирӕ ӕмбисонды хабӕрттӕ ӕмӕ таурӕгътӕ уыдис, уыдон ӕмбӕлгӕ уавӕры ӕмбырдгонд не сты. Уый тыххӕй абон кусӕм нӕ ахуыргӕндтимӕ. Туризмы райрӕзты хъуыддаджы алы фӕзилӕн дӕр ахсджиаг у, ӕмӕ уыцы фарстытыл у нӕ абоны ӕмбырд. Ныридӕгӕн не ‘хсӕн ис, бафӕзминаг чи у, ахӕм кусджытӕ. Ӕмӕ хъуамӕ мах уыдоны фӕлтӕрддзинадӕй пайда кӕнӕм. Уыдонӕй иу у Сергей Селезнев. Ӕрӕфы районы ӕрхъуыдыджын архайд кӕны йӕ ӕмкусджытимӕ, ӕмӕ уый сӕ куысты бӕрӕггӕнӕнтыл хорзӕрдӕм зыны».
Сергей Селезнев радзырдта, йӕ куысты цавӕр мадзӕлттӕй пайда кӕны ӕмӕ уыдон фӕрцы сӕ къухы абоны онг цы бафтыд саразын, уыдӕтты тыххӕй. Куыд зӕгъы, афтӕмӕй алы туристон маршрутӕн дӕр саразын хъӕуы бӕлвырд паспорт. Раст пайда кӕнын хъӕуы абоны техникон гӕнӕнтӕй, уӕлдайдӕр та Интернетӕй. Уым бӕлвырд ӕмӕ зӕрдӕмӕдзӕугӕйӕ куы ӕвдисӕм нӕ туристон авналӕнтӕ, уӕд уый фӕпайда уыдзӕн, Ирыстонмӕ фылдӕр туристтӕ цӕмӕй тырной, уымӕн. Сергей Селезнев дӕнцӕгтӕ ӕрхаста, йӕхӕдӕг разамынд цы туристон фирмӕ «Каматахостел»-ӕн дӕтты, уыцы кусджыты архайдӕй.
Цӕлхӕмбырды уыдысты нӕ республикӕйы туроператортӕ, туристон ӕмӕ альпинистон клубты минӕвӕрттӕ. Ӕмбырды архайджытӕ равзӕрстой кусӕг къорд, йӕ хӕс уыдзӕн, ныхас цы хъӕугӕ фарстытыл цыд, уыдоныл бӕлвырддӕр бакусын ӕмӕ, куыд гӕнӕн ис, афтӕ тагъддӕр ныхасӕй хъуыддагмӕ рахизын.
Баскаты Уырызмӕг
