Ацы бонты Дзӕуджыхъӕуы Хъӕбӕлоты Билары номыл Сывӕллӕтты сфӕлдыстады республикон галуаны цыд 17 регионалон конкурс «Наукӕмӕ къӕпхӕн».
Уый арӕзт ӕрцыд РЦИ-Аланийы Ахуырад ӕмӕ наукӕйы министрад, Хъӕбӕлоты Билары номыл Сывӕллӕтты сфӕлдыстады республикон галуан, Цӕгат Ирыстоны Хетӕгкаты Къостайы номыл паддзахадон университет ӕмӕ Цӕгат Ирыстоны ахуырады кусджыты зонындзинӕдтӕ бӕрзонддӕргӕнӕн институты хъӕппӕрисӕй.
Конкурс арӕзт ӕрцыд сывӕллӕтты ӕмӕ фӕсивӕды наукон ӕмӕ техникон рӕзты Федералон наукон-ахуырадон программӕ «Уӕрӕсейы Национ исбон»-ы фӕлгӕты.
31 январы Дзӕуджыхъӕуы Хъӕбӕлоты Билары номыл Сывӕллӕтты сфӕлдыстады республикон галуаны цыд 17 регионалон конкурс «Наукӕмӕ къӕпхӕн»-ы кӕронбӕттӕн ерысты. Йӕ уазджытӕ уыдысты: РЦИ-Аланийы национ ахастдзинӕдты фарстыты фӕдыл министр Цуциты Аслан, РЦИ-Аланийы ахуырад ӕмӕ наукӕйы министры хӕдивӕг Алыккаты Алан, политикон парти «Иугонд Уӕрӕсе»-йы ӕххӕсткомы секретар Ортабайты Тимур, Республикӕйы ветеранты советы сӕрдар Къаболаты Солтан, РЦИ-Аланийы профцӕдисты федерацийы сӕрдар Касаты Таймураз ӕмӕ иннӕтӕ. Уыдон арфӕ ракодтой конкурсы уӕлахиздзаутӕн, сӕ ахуыргӕнджытӕн, ныййарджытӕн ӕмӕ бӕрӕгбоны уазджытӕн.
— Арфӕ уын кӕнын конкурс «Наукӕмӕ къӕпхӕн»-ы кӕронбӕттӕны боны фӕдыл. Мӕнмӕ гӕсгӕ, конкурс «Наукӕмӕ къӕпхӕн» ахсы зынгӕ бынат, уымӕн ӕмӕ, нӕ бӕстӕйы цы алыхуызон спортивон, музыкалон ӕмӕ ӕндӕр хуызы конкурстӕ цӕуы, уыдоны ‘хсӕн хъуамӕ уа интеллектуалон конкурс дӕр. ӕмӕ абон наукӕйы фыццаг къахдзӕфтӕ чи кӕны, уыдонӕй, чи зоны, райсом аразгӕ уыдзӕн нӕ бӕстӕйы рухс фидӕн, — загъта РЦИ-Аланийы национ ахастдзинӕдты фарстыты фӕдыл министр Цуциты Аслан.
Конкурс «Наукӕмӕ къӕпхӕн»-ы 3-аг бынат чи бацахста, уыцы ӕвзонг наукӕиртасджытӕн министр балӕвар кодта 3-ӕм къӕпхӕны уӕлахиздзауы майдантӕ ӕмӕ Кады гӕххӕттытӕ. Уыдоны сты сывӕллӕтты техникон сфӕлдыстады хӕдзары ахуырдзау Екатеринӕ Афанасьева, Дзӕуджыхъӕуы Сывӕллӕтты сфӕлдыстады республикон галуаны ахуырдзау Битарты Дианӕ ӕмӕ иннӕтӕ.
Конкурс «Наукӕмӕ къӕпхӕн»-ы 2-аг бынат чи бацахста, уыцы курдиатджын сабитӕн 2-ӕм къӕпхӕны уӕлахиздзауы майдантӕ ӕмӕ Кады гӕххӕттытӕ радта республикӕйы Ветеранты советы сӕрдар Къаболаты Солтан. Нӕ кадджын хистӕры къухӕй арфӕйы ныхӕстимӕ уыцы хӕрзиуджытӕ райстой 22-ӕм скъолайы ахуырдзау Баймӕтаты Миланӕ, 11-ӕм скъолайы ахуыргӕнинаг Бӕцӕзаты Камиллӕ ӕмӕ иннӕтӕ.
Конкурс «Наукӕмӕ къӕпхӕн»-ы 1-аг бынат чи бацахста, уыцы уӕлахиздзаутӕн 1-ӕм къӕпхӕны уӕлахиздзауы майдантӕ ӕмӕ Кады гӕххӕттытӕ радта РЦИ-Аланийы ахуырад ӕмӕ наукӕйы министры хӕдивӕг Алыккаты Алан.
1-ӕм къӕпхӕны уӕлахиздзаутӕ сты 26-ӕм скъолайы ахуырдзау Алӕджыхъоты Георги, Суворовон училищӕйы ахуырдзау Бӕдзуаты Дауыт, гимназ «Диалоджы» ахуырдзау Баймӕтаты Ос-Бӕгъатыр ӕмӕ иннӕтӕ…
Алы къӕпхӕны дӕр уӕлахиздзауты нымӕц уыд тынг бирӕ. Адӕймаджы зӕрдӕ ради, уый бӕрц курдиатджын ӕмӕ зӕрдӕргъӕвд сывӕллӕтты уындӕй. Уыдон сты Ирыстоны фидӕн, нӕ адӕмы ныфсы мӕсыг.
Хъойбайты Галинӕ
Къам систа
Къӕбысты Харитон
