РЦИ-Аланийы Сæргълæууæг Сергей Меняйло фембæлд, Цæгат Ирыстоны Хетæгкаты Къостайы номыл паддзахадон университеты кусын чи райдыдта, уыцы проект «МГИМО-йы сæрдыгон скъола»-йы архайджытимæ.
Хъæппæрис царды уаргъ цæуы æртыккаг хатт Цæгат Ирыстон æмæ Æддагон ахастдзинæдты мæскуыйаг паддзахадон университеты (МГИМО) ‘хсæн æмгуыстады бадзырды бындурыл. Проекты архайынц МГИМО-йы 52 студенты æмæ цæгатирыстойнаг уæлдæр ахуырадон уагдæтты 30 студенты. Бацæттæ сын кодтой, къуырийы дæргъы чи цæудзæн, ахæм ахуырадон æмæ культурон-æмбарынгæнæн программæ – лекцитæ, мастер-класстæ, семинартæ, командон хъæзтытæ. Зонгæ сæ кæндзысты Ирыстоны национ культурæ, йæ туристон æмæ историон фæдзæхст æмæ зæрдылдаринаг бынæттимæ.
Сергей Меняйло фæбæрæг кодта, республикæ æмæ МГИМО-йы ‘хсæн пайдайаг æнгом бастдзинæдтæ кæй сæвзæрд, 2023 азы цы бадзырд бафыстой, уый та æнтыстджынæй æххæстгонд кæй цæуы, уымæн æвдисæн – Сæрдыгон скъола – практикон проекттæй иу.
– Сæрдыгон скъола студенттæн тынг хорз гæнæн у кæрæдзийы базонынæн, нæ уазджытæн та – Уæрæсейы регионтæй иуы царды уагмæ æркæсынæн. Нæ бæстæйы адæмты истори, культурæ, традицитæ æмæ æгъдæуттæ базонын пайда у, царды цы цаутæ цæуы, уыдон бамбарынæн. Сымах, æрыгон фæлтæр, хъуамæ зонат æвзæр æмæ хорз кæрæдзийæ хицæн кæнын, алчи уæ хъуамæ цæуа йæхи фæндагыл – уæд мах уыдзыстæм тыхджын паддзахад, никæй бон нæ уыдзæн басæттын. Нæ бæстæйы историйы уыд ахæм рæстæджытæ, кæйдæр куы фæзмыдтам, фæлæ, нæ амондæн, нæ Президенты руаджы абон ногæй нæ уидæгтæм здæхæм. Уæрæсейы бирææнусон истори у тох æмæ уæлахизты истори, – загъта Цæгат Ирыстоны Сæргълæууæг.
Проекты архайджытæм арфæйы фыстæг æрбарвыста МГИМО-йы ректор Анатолий Торкунов. Бæстæйы раззагдæр уæлдæр ахуыргæнæндоны разамонæг Сæрдыгон скъола схуыдта уадиссаг цау. «Фæнды мæ бузныг зæгъын РЦИ-Аланийы Сæргълæууæг Сергей Меняйло, ЦИПУ-йы ректор Огъуаты Алан æмæ республикæйы Хицауадæн се ‘ххуысы тыххæй Сæрдыгон скъола саразыны хъуыддаджы. Мах стыр аргъ кæнæм, регионы разамынд йе ‘ргом кæй здахы нæ университетимæ æмгуыстадмæ, фæсивæдимæ куыстмæ, æхсæнадон дипломатты ног фæлтæр цæттæ кæнынмæ. МГИМО æмæ республикæ ныр цалдæр азы алывæрсыг æмгуыстадыл зæрдиагæй архайынц, нæ университеты студенттæ æмæ ахуыргæнджытæ алы мадзæлтты фембæлынц, ныры Сæрдыгон скъола та иу фæзы баиу кодта МГИМО, ЦИПУ, Хæххон аграрон университет æмæ Цæгат Кавказы хæххон-металлургон инситутты студентты», – загъд ис арфæйы фыстæджы.
Куыд ивгъуыд азты, афтæ та студенттæн фадат уыд Цæгат Ирыстоны Сæргълæууæгмæ фарстытæ раттынæн. Зæгъæм, социалон-экономикон къабæзты рæзтæн республикæйы хуызæр фидæн кæмæн ис. Спикер фæбæрæг кодта, нæ бæстæйы алы субъектæн дæр кæй ис географион, историон, экономикон уавæртæй сæвзæргæ хицæндзинæдтæ. Цæгат Ирыстонæн, Сергей Меняйлойы хъуыдымæ гæсгæ, уыдон сты хъæууонхæ-дзарадон комплекс, туризм, бальнеологи, транспортон-логистикон къабаз. Уымæй уæлдай ма, республикæйы Сæргълæууæг куыд фæбæрæг кодта, афтæмæй – сæрмагонд æфсæддон операцийы архайджытæн алывæрсыг æххуыс.
Афтæ ма Сергей Меняйло, Цæгат Ирыстоны æппæты фыццаг, республикæимæ зонгæ чи нæу, уыцы адæмæн цы равдисид, зæгъгæ, ахæм фарстæн ратта дзуапп:
– Мæхи царды историйы фылдæр хай Райгуырæн бæстæ хъахъхъæнынæн кæй раттон, ууыл æнцойгæнгæйæ, æз равдисин нæ патриотикæ – уый дзурæг у нæ хистæр фæлтæры хъæбатырдзинад, æхсар æмæ æнæбасæтгæ тыхыл. Æз сын равдисин Дзæуджыхъæуы Уæлахизы бæрæгбон. Нæ горæты æппæт рекламон фæйнæджытыл акци «Бакæс-ма сын сæ цæсгæмттæм»-ы фæлгæты вæййынц нæ хъайтарты портреттæ. Нæ республикæмæ уазæгуаты чи ‘рбацæуы, уыдонæн æз алкæддæр фæзæгъын, цæмæй бабæрæг кæной Дзæуджыхъæуы Намысы мемориал æмæ Беслæн, – загъта Сергей Меняйло.
Фембæлды архайджытæй иу бафиппайдта, ахуырадон артдзæсты сæ кæй цæттæ кæнынц официалон бæрзонд бынæтты кусджытимæ дипломатон æмвæзадыл ныхас кæнынмæ, æмæ Сергей Меняйлойы бафарста, хи куыд даргæ у, куыд дзургæ у семæ, уымæй. Цæгат
Ирыстоны Сæргълæууæг загъта, сæйрагдæр – алкæддæр адæймагæй баззайын, цæсгомджын æмæ æууæнкджын уæвын.
– Уый хуымæтæг хъуыддаг у – адæмимæ схъæл-дзырд кæнын нæ хъæуы, уый дæ хорзмæ не ‘ркæндзæн, – дзуапп ратта Сергей Меняйло.
РЦИ-Аланийы Сæргълæууæг æмæ Хицауады пресс-службæ
