Ацы бонты Цӕгат Ирыстоны ӕфсымӕрон балцимӕ уыдысты горӕт Волгограды минӕвӕрттӕ. Делегацийы архайдтой горӕты ӕхсӕнадон палатӕйы уӕнгтӕ, политикон партиты минӕвӕрттӕ ӕмӕ журналисттӕ.
Ирыстоны уазджытӕн ӕхсызгон фембӕлдтытӕ уыд Дзӕуджыхъӕуы. Фыццаджы-фыццагдӕр сӕ фысымтӕ ахуыдтой «Хӕстон намысы горӕт»-ы мемориалон комплексмӕ. Делегацийы уӕнгтӕн бӕстон радзырдтой, Ирыстоны цӕрджытӕ ӕмӕ нӕ бӕстӕйы иннӕ адӕмты минӕвӕрттӕ Фыдыбӕстӕйы Стыр хӕсты рӕстӕг Дзӕуджыхъӕу цыфыддӕр знагӕй куыд хъахъхъӕдтой, уый тыххӕй.
Фӕстӕдӕр фысымтӕ ӕмӕ уазджытӕ бабӕрӕг кодтой мемориалон комплекс «Барбашовы быдыр». Уым, стӕй иннӕ цыртдзӕвӕнты раз дӕр уазджытӕ дидинджытӕ сӕвӕрдтой.
Волгограды минӕвӕртты делегацийы балцы сӕйрагдӕр нысан уыд ахуыргӕнӕн чиныг «Ирыстоны хъӕбултӕ Сталинградыл тохы хӕстыты»-йы презентацийы архайын. Уыцы чиныджы автор у журналист ӕмӕ публицист Михаил Серенко.
Волгограды ӕхсӕнадон организациты минӕвӕрттӕ разыйӕ баззадысты, Цӕгат Ирыстоны сын цы фембӕлдтытӕ уыд, уыдонӕй. «Махӕн ӕхсызгон у ахӕм кадджын адӕмы суазӕг кӕнын. Мах иу кӕны, нӕ хистӕртӕ Фыдыбӕстӕйы Стыр хӕсты азты цы хъӕбатырдзинад ӕмӕ удуӕлдайдзинад равдыстой, уый», — фембӕлдтытӕй иуы йӕ раныхасы фӕбӕрӕг кодта Дзӕуджыхъӕуы администрацийы культурӕйы управленийы хицау Мӕрзойты Руслан.
Делегацийы уыдысты УФ-йы ӕхсӕнадон палатӕйы уӕнг Сергей Бурлаков, Волгограды ӕхсӕнадон палатӕйы уӕнг Фӕрниаты Хъазыбег, Волгограды таджикӕгты национ-культурон ӕхсӕнады разамонӕг Акран Азимджонов ӕмӕ иннӕтӕ.
Нӕ уацхӕссӕг
