«Раджы дæр æмæ ныр дæр комитеты архайды сæйраг нысан у, нæ республикæйы фæндæгтæ æдас æмæ æнцонвадат куыд уой, уыцы хъуыддаг», – ацы ныхæстæй райдыдта журналисттимæ фембæлд РЦИ-Аланийы Фæндæгты хæдзарады комитеты сæрдар Солиты Тариэль.
Æнæбафиппайгæ нæй, афæдзæй-афæдзмæ æнцонвадатдæр кæй кæнынц нæ фæндæгтæ. Республикæйы разамынд иудадзыг йæ хъус дары ацы фарстамæ. Федералон æмæ регионалон бюджетты æххуысæй арæзт æмæ цалцæггонд цæуынц, æхсызгонæй сæ пайда кæнынц куыд фæндаггонтæ, афтæ шофыртæ дæр.
Уацхæсджыты фарстытæн дзуапп дæтгæйæ, комитеты сæрдар загъта, ныртæккæ æнæрлæугæйæ кæй цæуы Æрхонкæйы станицæйы иувæрсты фæндаджы арæзтад.
– Уый махæн фыццаградон куыст у – транзитон транспорт нæ уынгтæй ракæнæм, цæмæй фæндаггон фыдбылызтæ æрцæуынæй тæссаг ма уа. Ныридæгæн уал адæмæн лæггад кæнынц Цыкола æмæ Мичурины иувæрсты нырыккон автомобилон фæндæгтæ. Станицæйы иувæрсты фæндаджы арæзтад райдыдта 2025 азы, уыцы хъуыддагыл федералон æмвæзады бакуыста нæ республикæйы Сæргълæууæг Сергей Меняйло, Уæрæсейы Транспорты министрад æмæ «Росавтодор»-имæ ныхасгæнгæйæ. Ног фæндагæн йæ дæргъ уыдзæн 16,6 километры, уыдзæн дзы цæугæдоны сæрты хид дæр. Ацы аз фæндаджы хицæн хæйттæ байгом уыдзысты, æнæхъæнæй та объект сцæттæ уыдзæн 2027 азы кæронмæ. Æппындæр ницы къуылымпытæ ис арæзтады. Цы хуымзæххытыл ацæудзæн фæндаг, уыдоны хицæуттæ, закъонмæ гæсгæ, компенсаци райстой, – загъта Солиты Тариэль æмæ бафтыдта, Фæндæгты хæдзарады комитет у хицауиуæггæнæг оргæн, не стыр хæс у, кæм æмæ куыд арæзт цæуынц фæндæгтæ, куыд хардзгонд цæуынц паддзахадон фæрæзтæ, уымæ цæст дарын, йæ проектæй райдай æмæ йе сцæттæйы онг.
Подрядон куыстуæттæ ифтонг сты нырыккон сæрмагонд техникæйæ, ис нæм дæсны специалисттæ. Цалдæр асфальтгæнæн заводы фæсарæйнаг кусæнгæрзтимæ уадзынц хæрзхъæд продукци.
Рохуаты журналисттæй нæ баззад хæххон фæндæгты уавæр дæр.
– Цæгат Ирыстонмæ цæуы бирæ туристтæ. Дисы сæ æфтауы нæ æрдзы рæсугъддзинад, фæлæ уазæг, фыццаджыдæр, аргъ скæны фæндæгты уавæрæн. Национ проект «Инфраструктурæ цардæн»-мæ гæсгæ, туристон бынæттæм, историон хæзнатæм бацæуынæн сарæзтой 140 километры бæрц фæндæгтæ. Ацы азы программæмæ бахастам, автомобилон фæндаг «Джызæл-Хъæрмæдон-Дæргъæвс-Дзуарыхъæу»-ы 22 километры бындурон рацарæзт. Хохы Санибайы хъæу рæстæгимæ заууатмæ æрцыд, нæ йæм уыд хуызæнæн фæндаг. Фæлæ ныр Ирыстоны кæмттæ баиу кæндзæн, цы ног фæндаг аразынц, уый. Комбæсты райрæзтæн уый æнæмæнг хъуыддаг у.
Иннæ фарста баст уыдис Дзæуджыхъæуы иувæрсты цæуæг фæндагимæ.
– Мах стæм транзитон республикæ. Бирæ рог æмæ уæзласæн машинæтæ цæуы сыхаг республикæтæм, Фæскавказмæ. Ацы фæндаг æхсызгон хъæуы республикæйы. Фидæны 2027 азы сцæттæ уыдзæн. Мæхæдæг ыл ацыдтæн, сæйрагдæр амаддзæгтæ æмæ хидтæ сты цæттæ, электрон тыхы цæджындзтæ ма рацаразын хъæуы. Уыдзæн рæсугъд, æнцонвадат фæндаг. Нæ республикæйы ис 174 хиды, æмæ сæ уавæрыл дзуапдæттæг у Фæндæгты хæдзарады комитет. Уыдонæй 44 хиды бындурон цалцæггонд æрцыдысты, иннæтæ сты зæрдæхсайгæ. Цæмæй хид цалцæг кæнын райдайæм, уымæн хъæуы цæттæгæнæн, сбæлвырдгæнæн куыстытæ бакæнын.
Зæгъæм, «Цæнгæт» хид 2027 азы куысты пъланмæ хаст æрцыд. Хæстæгдæр рæстæг проектон-сметон гæххæттытæ сцæттæ уыдзысты. Подрядон куыстуат куы сбæрæг уа, уæд профилон куыстуæттимæ бадзырдтæ бафысдзысты, – загъта Солиты Тариэль, фарстайæн дзуапп дæтгæйæ. Куыд фæнысан кодта, афтæмæй горæты хидтæ, сæ алыварс зæххы хæйттимæ, иугай лæвæрд цæудзысты республикæйы балансмæ.
Пресс-конференцийы ма ныхас цыдис æндæр фарстатыл дæр.
Гугкаты Жаннæ,
къам систа Татьяна ШЕХОДАНОВА
