Акционерон ӕхсӕнад «Электроцинчы» (у Урайлаг хӕххон-металлургон компанийы дӕлхайад) тӕссаг куыстадон объекты консервацийы фӕдыл ӕппӕт нысангонд мадзӕлттӕ дӕр афойнадыл ӕххӕстгонд ӕрцыдысты.
Уый тыххӕй журналисттӕн фехъусын кодта заводы администрацийы минӕвар.
Зындгонд куыд у, афтӕмӕй 2018 азы октябры «Электроцинчы» цехӕй иуы ӕрцыд зынгсирвӕзт. Уӕд хаст ӕрцыд уынаффӕ заводы куыстад ӕруромыны тыххӕй. Уыимӕ, сӕрмагонд пъланы бындурыл райдыдта, заводы фӕзуатыл цы 14 тӕссаг куыстадон объекты уыд, уыдоны консервацийы фӕдыл архайд. Фӕстӕдӕр, 2019 азы июны, завод сӕ куысты бынӕттӕй суӕгъд кодта 1 мин адӕймагӕй фылдӕр.
«Ӕппӕт тӕссаг куыстадон объектты консервацийы фӕдыл дӕр бацӕттӕ кодтам сӕрмагонд проекттӕ. Ныридӕгӕн уыцы куыстытӕ ахицӕн кодтам. Афтӕмӕй ныр уыцы куыстадон дӕлхайӕдтӕ тӕссаг объектты номхыгъдӕй дӕр систам», — радзырдта заводы администрацийы минӕвар.
Йӕ ныхасмӕ гӕсгӕ, зынгсирвӕзт кӕм ӕрцыд, уыцы цехӕн йӕ иу хай ныридӕгӕн райхӕлдтой. Уыимӕ, дарддӕр цӕуынц здыйы куыстады технологон линитӕ райхалыны куыстытӕ дӕр. Заводы администрацийы минӕвар куыд фӕнысан кодта, афтӕмӕй уыцы бынӕтты ног куыстад байгом кӕныныл ныхас нӕ цӕуы.
Нӕ уацхӕссӕг
