Цӕгат Ирыстоны 2020 азы адарддӕр уыдзӕн «Адӕмы кӕлӕддзаг хӕдзӕрттӕй ног цӕрӕнуӕттӕм раивыны» программӕйы уагӕвӕрдтӕ ӕххӕст кӕныныл куыст.
Уый тыххӕй фехъусын кодта РЦИ-Аланийы цӕрӕнуӕттӕ-коммуналон хӕдзарады, артаг ӕмӕ энергетикӕйы министры хӕдивӕг Кучиты Зауырбег.
«2020 азы «Адӕмы кӕлӕддзаг хӕдзӕрттӕй ног цӕрӕнуӕттӕм раивыны» сӕрмагонд программӕйы архайдзысты Рахизфарсы ӕмӕ Дыгуры районтӕ. Программӕйы фӕткмӕ гӕсгӕ, кӕлӕддзаг хӕдзӕрттӕй ног цӕрӕнуӕттӕм раивдзыстӕм 36 бинонты. Зӕгъӕм, Рахизфарсы районы ныридӕгӕн радих кодтой, ног цӕрӕн хӕдзар кӕм уыдзӕн, уыцы бынат. Хӕстӕгдӕр рӕстӕг бӕрӕггонд ӕрцӕудзӕн подрядон организаци дӕр», — загъта Кучиты Зауырбег.
Министры хӕдивӕджы ныхасмӕ гӕсгӕ, 2019 азы ацы программӕйы фӕлгӕты кӕлӕддзаг хӕдзӕрттӕй ног фатертӕм раивтой 54 бинонты (уыцы куыстытыл схардз кодтой 90 милуан сомы бӕрц). Зӕгъӕм, 2021 азы та ног цӕрӕнуӕттӕм раивдзысты 30 бинонты (уыцы куыстытӕн та нысангонд цӕуы 59 милуан сомы бӕрц).
Ӕмткӕй райсгӕйӕ, 2019-2024 азты программӕйы уагӕвӕрдтӕ ӕххӕстгонд цӕуынц Дзӕуджыхъӕуы, стӕй Мӕздӕджы, Дыгуры ӕмӕ иннӕ районты. Ног цӕрӕнуӕттӕм раивыны рады ис 444 бинонтӕ (ома, 1202 адӕймаджы). Уыимӕ, уыцы азты ӕмгъуыдмӕ программӕйы уагӕвӕрдтӕ ӕххӕст кӕнынӕн хъуамӕ ӕдӕппӕт дихгонд ӕрцӕуа 746,32 милуан сомы.
Нӕ уацхӕссӕг
