Хуссайраг ӕфсӕддон зылды 58-ӕм ӕфсады дӕлхайӕдтӕй иу у хицӕн мотоӕхсӕг сырхтырысаджын, Суворовы ӕмӕ Фӕллойы Сырх тырысайы орденхӕссӕг 19-ӕм бригад.
Йӕ командӕгӕнӕг, булкъон Роман Вязовский, йӕ хӕдивӕг, дӕлбулкъон Эдуард Тангаев разамынд дӕттынц сӕдӕгай адӕмтӕн.
Фыдыбӕстӕ хъахъхъӕнӕджы боны агъоммӕ бабӕрӕг кодтам ацы ӕфсӕддон хай. Мидӕмӕ уадзӕн-контролон бынаты нӕ размӕ рацыд майор Айдар Зарипов. Башкираг лӕппу ныр авд азы йӕ бинонтимӕ цӕры Дзӕуджыхъӕуы.
— Мӕ хистӕр ӕфсымӕр сахуыр кодта Челябинскы танкон ӕфсӕддон училищӕйы. Ӕз дӕр уый фӕндагыл ӕрлӕууыдтӕн. Уӕлдӕр ӕфсӕддон ахуырад райстон ӕмӕ службӕ кодтон Цӕцӕны республикӕйы. Алыхуызон тӕссаг уавӕрты дӕр-иу бахаудыстӕм, фӕлӕ ӕфсӕддонӕн йӕ хӕс у адӕмы сабырдзинад, Фыдыбӕстӕ хъахъхъӕнын. Бауарзтам Ирыстон, мӕ кӕстӕртӕ ирон ӕвзаг башкираг ӕвзагӕй хуыздӕр зонынц. Ӕмӕ мӕнӕн уый ӕхсызгон у, — зӕгъы Айдар Зарипов.
Уӕрӕх кӕрты ис хӕрзӕфснайд къахвӕндӕгтӕ, ӕфсӕддон техникӕйы хуызты равдыст, ис дзы чысыл кувӕндон дӕр. Стыр бӕстыхай ахсы бригады хӕрӕндон. Ис дзы, абоны домӕнтӕн дзуапп чи дӕтты, ахӕм ифтонггӕрзтӕ. Кусынц дзы дӕсны хӕринаггӕнджытӕ Читайӕ.
— Чи нӕм службӕ кӕны, уыдон сты Волгоградӕй, Краснодарӕй, Читайӕ, Цӕгат Кавказы республикӕтӕй, ирыстойнаг лӕппутӕ. Алы адӕмыхӕттытӕ лымӕнӕй, кӕрӕдзи ӕмбаргӕйӕ цӕрынц, — зӕгъы майор.
Равдыстой нын салдӕтты цӕрӕн бынӕттӕ дӕр. Дуарыл фыст сты сӕ мыггӕгтӕ: «Цискаридзе, Головачев, Лазаров». Лӕппутӕ ахуырты уыдысты полигоны. Дыккаг уӕладзыджы баййӕфтам ӕмбырд, уым хицӕн къордимӕ фембӕлд Дзӕуджыхъӕуы гарнизоны ӕфсӕддон прокуратурӕйы минӕвар. — Ахӕм ӕфсӕддон-политикон ахуыртӕ ӕнӕмӕнг хъӕуынц салдӕтты ӕмӕ афицерты, цӕмӕй зоной сӕ бартӕ ӕмӕ сӕ хӕстӕ, цӕмӕй закъоны ныхмӕ ма цӕуой, — загъта прокуратурӕйы минӕвар.
Рӕнхъон Виктор Посыпайло Ростовы облӕстӕй у. Йе ‘фсӕддон службӕйӕ аст мӕйы ахицӕн сты.
— Мӕ райгуырӕн горӕт Сальскы каст фӕдӕн индустриалон техникум. Ӕфсӕддон комиссарады мын куы загътой, Цӕгат Ирыстоны службӕ кӕндзынӕн, уӕд ницыма зыдтой, уый кӕм ис, уымӕн. Тынг рӕсугъд мӕм кӕсы Ирыстон, йӕ бӕрзонд хӕхтӕ мӕ дисы ӕфтауынц, стӕй бауарзтон ирон чъиритӕ. Махмӕ ахӕм хӕринӕгтӕ нӕ кӕнынц. Нӕлгоймаг хъуамӕ йӕхи бавзара ӕфсады. Мӕ бинонтимӕ куы фӕдзурын, уӕд сын фӕзӕгъын, уӕ зӕрдӕ мӕм ма ӕхсайӕд, ницы хъуаг ӕййафӕм, уӕлӕдарӕсӕй, хӕринагӕй — алцӕмӕй ӕххӕст, нӕ цӕрӕнуӕтты — ӕппӕт уавӕртӕ. Хистӕр афицерты амындӕй базыдтам хӕцӕнгӕрзтӕ ӕмӕ ӕфсӕддон техникӕимӕ архайын. Ирыстон мӕ мысинӕгты баззайдзӕнис, адӕм дзы хӕларӕй цӕрынц, ӕфсӕддон лӕгӕн дзы кад кӕнын зонынц, — зӕгъы Виктор.
Цы батальоны нӕ суазӕг кодтой, уый дӕлхайӕдтӕн се хӕс у, бригадӕ хӕстӕрмӕгӕй, артагӕй, хойраджы продукттӕй ӕмӕ ӕфсӕддон-техникон исбонӕй ӕххӕст кӕнын. Майор Зарипов куыд зӕгъы, афтӕмӕй сын ӕнгом бастдзинад ис алы салдаты хионтимӕ дӕр, сӕ бон у комкоммӕ телефонӕй дӕр ӕрбадзурын. Фӕсивӕды ӕнӕниздзинадмӕ кӕсынц медицинон кусджытӕ, сӕ уӕгъд рӕстӕг цӕмӕй зӕрдӕрайгӕйӕ ӕрвитой, ууыл архайынц афицертӕ.
Хуссайраг ӕфсӕддон зылды 58-ӕм ӕфсады цы фӕтк ӕвӕрд ис, уый ӕвдисӕн у Уӕрӕсейы Гӕрзифтонг тыхты абоны цӕттӕдзинадӕн.
Гугкаты Жаннӕ
Къамтӕ систа КЪӔБЫСТЫ Харитон
